Андижон шаҳрида Хотин-қизлар тадбиркорлик маркази фойдаланишга топширилди. Бу ҳақда «Дарё»га Хотин-қизлар қўмитаси матбуот хизмати маълум қилди.
Мазкур марказ Президентнинг «Хотин-қизларнинг меҳнат ҳуқуқлари кафолатларини янада кучайтириш ва тадбиркорлик фаолиятини қўллаб-қувватлашга оид чора-тадбирлар тўғрисида»ги қарорига асосан ташкил қилинган.
Унинг очилиш маросимида Бош вазир ўринбосари, Хотин-қизлар қўмитаси раиси Танзила Норбоева иштирок этди.
Марказда аёлларнинг бизнес юритиш кўникмалари шакллантирилади, маслаҳатлар берилади ва амалий ёрдам кўрсатилади. Шунингдек, бу ерда узоқ муддат бола парваришлаш таътилида бўлган, мушкул иқтисодий аҳволга тушган аёлларни касблар бўйича қайта тайёрлашга ҳам кўмаклашилади.
Тадбиркорлик билан шуғулланиш истагини билдирган хотин-қизлар махсус дастур бўйича ўқитилади. Муваффақиятли ўзлаштирганларга туман (шаҳар) хотин-қизлар қўмитаси тавсиясига кўра, тадбиркорлик фаолиятини йўлга қўйиш учун имтиёзли кредит берилади.
Бунинг учун Хотин-қизларни ва оилани қўллаб-қувватлаш жамоат фонди банкларга ҳар йили 100 миллиард сўм ажратади, унинг камида ярми қишлоқ жойлардаги хотин-қизларнинг бизнесини ривожлантиришга йўналтирилади.
Тадбирда Андижон шаҳридаги маҳалла фуқаролар йиғинларида фаолият олиб бораётган хотин-қизлар билан ишлаш бўйича мутахассисларга планшетлар топширилди.