Тошкент аҳолиси Москва шаҳрининг «Шереметьево» аэропортида содир бўлган авиаҳалокат сўнг Россия элчихонаси биноси олдига мотам рамзи сифатида гуллар олиб келишмоқда. Бу ҳақда Sputnik хабар берди.
Аввалроқ Шавкат Мирзиёев Москва шаҳрининг «Шереметьево» аэропортида самолётнинг фавқулодда қўниши оқибатида инсонлар ҳалок бўлгани муносабати билан Владимир Путинга ҳамдардлик мактуби йўллаб, ҳалок бўлганларнинг яқинларига самимий таъзия ва ҳамдардлик билдириб, жароҳат олганларнинг тез фурсатда соғайишларини тилаган эди.
5 май,якшанба куни кечқурун Москва-Мурманск йўналиши бўйича парвозни амалга ошираётган Sukhoi Superjet-100 самолёти ҳалокатга учради. Парвознинг 28-дақиқасидан сўнг экипаж аэропортга фавқулодда қайтишга қарор қилди.
Ёмон об-ҳаво туфайли самолёт иккинчи уринишдан сўнг ерга қўнишга эришган. Кескин қўниш натижасида лайнер шасси стойкалари синиб кетиб, двигателлари ёниб кетган.
Кейинчалик ёнғин самолётнинг қанот қисмига ўтган. Ҳалокат оқибатида 41 киши ҳалок бўлди, 33 нафар йўловчи ва 4 нафар экипаж аъзолари омон қолди.
Вилоятда уч кунлик мотам эълон қилинди. Ҳалок бўлганларнинг оила аъзоларига бир миллион рубль (15 500 доллар), жабрланганларга 500 минг рубль (7 700 доллар) берилади.
Фожиадан сўнг Тергов қўмитаси жиноий иш қўзғатди. Россия бош вазири Дмитрий Медведев тергов ўтказиш бўйича давлат комиссиясини тузиш тўғрисида топшириқ берди.
Ўзбекистон ТИВ хабарига кўра, 2019 йилнинг 6 май куни эрталаб ҳолатига кўра 5 майда Москвадаги «Шереметьево» аэропортига самолётнинг фавқулодда қўниши натижасида қурбон бўлганлар ва жароҳатланганлар орасида Ўзбекистон фуқаролари йўқ.
Изоҳ (0)