15 апрель куни жиноят ишлари бўйича Яшнобод туман судида Вестминстер университетининг 58 ёшли ходимини уриб кетган 31 ёшли Жамшид Абдураҳмоновга нисбатан жиноят ишини кўриб чиқиш бўйича суд жараёни ниҳоясига етиб, суд ҳукми эълон қилинди. Бу ҳақда «Дарё»га Олий суд вакили маълум қилди.
Мазкур ҳодиса 24 январда содир бўлган, ўша вақтда Lacetti автомобили ҳайдовчиси Яшнобод туманидаги Шаҳрисабз ва Тараққиёт кўчалари кесишмасидаги пиёдалар ўтиш жойида машинани тўхтатмай, эркак пиёдани уриб юборган. Пиёда Вестминстер университетининг ходими (1960 йилда туғилган) бўлган. 29 январда эркак олинган жароҳатлар оқибатида шифохонада жон берган.
Суд жиноят иши материалларини ҳар томонлама ва тўлиқ ўрганиб, Жамшид Абдураҳмоновни Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисмида назарда тутилган жиноятни содир этганликда айбдор деб топган.
Жиноят ишлари бўйича Яшнобод туман суди Жамшид Абдураҳмоновга 2 йил муддатга транспорт воситаларини бошқариш ҳуқуқидан маҳрум қилинган ҳолда 4 йил муддатга озодликдан маҳрум қилиш жазоси тайинлади. Жамшид Абдураҳмоновга нисбатан Жиноят кодексининг 72-моддаси (шартли ҳукм қилиш) қўлланилиб, тайинланган озодликдан маҳрум қилиш жазоси шартли ҳисобланиб, 2 йил синов муддати белгиланди.
Изоҳ (0)