Британиянинг курорт шаҳри соҳилларини йирик медузалар «ишғол қилди» (фото ва видео)

Британиянинг Торки шаҳри соҳилларига улкан медузалар тўдаси ёпирилди, дея хабар беради National Geographic.

Англиянинг жанубий қирғоғида жойлашган Торки шаҳри аҳолиси соҳилда кўп миқдорда Rhizostoma pulmo медузаларини топган.

Бу медузалар Атлантика океанининг шимоли-шарқий қисмида, Адриатик, Ўрта ер денгизи, Қора, Азов, Ирландия ва бошқа денгизларда кенг тарқалган. Уларнинг ўртача диаметри 40 сантиметргача, баъзан 90 сантиметргача бўлган медузалар ҳам учрайди.

Улкан ҳажми ва 35 килограммгача бўлган вазнига қарамай улар одамларга хавф солмайди: уларнинг заҳри жуда заиф, одамга етиши мумкин бўлган максимал зарар бу катта бўлмаган тошмалардир.

Бу медузалар Британия денгизларида учраши мумкин бўлган энг йириги, бироқ у соҳилларга жуда кам чиқади.

Мутахассисларга кўра, сув ҳароратининг исиб кетиши медузаларнинг қирғоққа чиқишига сабаб бўлган.