Тошкент, Самарқанд, Бухоро ва Қўқон шаҳарларида 30 апрелга қадар Ўзбекистон Маданият вазирлиги, Давлат филармонияси, Маданият ва санъатни ривожлантириш фонди, «Илҳом» театри жаз-клуби, Тошкент шаҳар ҳокимлиги томонидан Франция, Исроил, Ҳиндистон, Индонезия, Венгрия, Туркия, Буюк Британия, Швейцария ва Чехия элчихоналари кўмагида Халқаро жаз фестивали бўлиб ўтмоқда.
Индонезиянинг Ўзбекистондаги элчихонаси ходими Жамила Юсупованинг «Дарё» мухбирига маълум қилишича, бу йилги фестивалда Индонезиядан «Гамелан» анъанавий мусиқа оркестри қатнашмоқда. Оркестр 20 апрель куни Ўзбекистон давлат консерваториясида чиқиш қилиб, томошабинларга ўз санъатини намойиш этди.
«Беш йилдан бери апрель ойида жаз фестивали ўтказилади. Индонезия элчихонаси фестивалда тўртинчи маротаба қатнашяпти. Ҳар йили фестивалга турли гуруҳларни олиб келишга ҳаракат қиламиз. Бу гал ‘Гамелан’ оркестри қатнашмоқда. Гуруҳнинг 14 нафар аъзоси индонез миллий чолғуларини жаз билан омухталаштирган ҳолда чиқишлар тайёрлаган», — деди Жамила Юсупова. «Гамелан» томонидан Самарқанд чет тиллар институтида индонез тилини ўрганаётган талабалар учун ҳам маданий дастур намойиши режалаштирилган.
Халқаро фестивалда исроиллик пианиночи ва бастакор Омри Мор, Туркиядан «Турумтай—Зарич» гуруҳи, венгер жаз-рок қўшиқчиси ва гитарачи Барна Пели, ҳиндистонлик хонанда Шефали Алварес, Швейцариядан Малколм Брафф ва Клер Югенен дуэти ва бошқа жаз мусиқачилари ҳам қатнашмоқда. Концертлар Тошкентда «Туркистон» саройида, Давлат консерваториясида, «Илҳом» театри ва Ёшлар театрида бўлиб ўтади. Шунингдек, Самарқанд, Бухоро ва Қўқонда ҳинд мусиқачиларининг чиқишлари бўлиб ўтади.
Изоҳ (0)