18–21 апрель кунлари Қарши шаҳрида ёнғин ўчириш амалий спорти бўйича Ўзбекистон «Динамо» жисмоний тарбия ва спорт жамияти чемпионати ўтказилди. Чемпионатда Қорақалпоғистон Республикаси, Тошкент шаҳар ва вилоятлар ёнғин хавфсизлиги бошқармалари ҳамда объектларда ёнғин хавфсизлигини таъминлаш бошқармалари терма жамоаларидан иборат 17 та жамоа иштирок этди. Бу ҳақда «Дарё»га Қашқадарё вилоят фавқулодда вазиятлар бошқармаси матбуот хизмати хабар бермоқда.
Матбуот хизмати хабарига кўра, чемпионатда терма жамоалар 4х100 метрли ёнғин ўчирувчилар эстафетаси, 100 метрга тўсиқлар оша югуриш, ишғол қилиш нарвонида ўқув минорасининг 4-қаватига кўтарилиш ҳамда ёнғин ўчириш автомобили орқали жанговар ёйилиш турлари бўйича куч синашган.
4х100 метрли ёнғин ўчирувчилар эстафетаси тури бўйича биринчи ўринни Қашқадарё вилояти терма жамоаси қўлга киритган. 100 метрга тўсиқлар оша югуриш баҳсида эса биринчи ўрин Андижон вилоятига насиб этган. Ишғол қилиш нарвонида ўқув минорасининг 4-қаватига кўтарилиш турида омад яна Қашқадарё вилояти вакилларига насиб этган.
Мусобақа якунида ғолибликни қўлга киритган ҳар бир жамоа аъзолари «Динамо» жисмоний тарбия ва спорт жамияти дипломи ва қимматбаҳо совғалари топширилди.
Мусобақада 4 тур бўйича умумжамоа ҳисобида Қашқадарё вилояти жамоаси 3-ўрин, Ёнғин хавфсизлиги институти терма жамоасига 2-ўрин ва Бухоро вилояти жамоаси 1-ўринни қўлга киритган.
Изоҳ (0)