Бугун, 11 апрель куни Алишер Навоий номидаги Тошкент давлат ўзбек тили ва адабиёти университетига атоқли тилшунос олим, профессор Отақўзи Азизовнинг шахсий кутубхона фонди совға қилинди. Бу ҳақда университет матбуот хизмати «Дарё»га хабар берди.
Маълум қилинишича, олимнинг 3000 дан ортиқ турли тиллардаги бадиий, илмий, оммабоп ва қомусий китоблари университет кутубхонасига талабалар фойдаланиши учун топширилган. Тақдим қилинган китоблар 6 тилда. Уларнинг катта қисми илмий-методик асарлар. Китобларнинг катта қисми эса қайта нашр этилмаган ноёб асарлардир.
Шу куни университетда Отақўзи Азизов номидаги рус тили ва адабиёти ўқув хонаси ҳам ташкил этилди. Очилиш маросимида Россия фан ва маданият маркази ходимлари, олимнинг шогирдлари, ҳамкасблари ва оила аъзолари ҳам иштирок этди.
Маълумот учун, Отақўзи Азизов 1910 йилда таваллуд топган. Олим Ўзбекистон ва Қорақалпоғистонда хизмат кўрсатган фан арбоби, филология фанлари доктори, профессор, Россия Таълим академиясининг чет эл мухбир аъзоси.
Олим умрини ўзбек тилшунослиги, лексикографияси, рус ва ўзбек тилларининг қиёсий ўрганиш масалаларига бағишлаган, дарсликлар, русча-ўзбекча ва бошқа луғатлар тузган. Ўзбекистонда рус тилини фан сифатида ўқитиш методикасини ишлаб чиққан. Бир муддат Низомий номидаги ТДПИда ишлаган ва умрининг охиригача Ўзбекистон Миллий университетида ишлаган.
Изоҳ (0)