11 апрель куни соат 17:00 да Ўзбекистон давлат санъат музейи Қозоғистон Миллий музейи билан ҳамкорликда «Олтин одамнинг дунё музейлари бўйлаб юриши» номли халқаро кўргазма лойиҳаси доирасида «Буюк дашт мероси: заргарлик санъати дурдоналари» кўргазмаси ўтказади. Бу ҳақда Маданият вазирлиги матбуот хизмати хабар берди.
Хабарда айтилишича, кўргазма ўтказилишидан мақсад қардош халқларни Евросиё Буюк дашт ҳудудининг илк темир давридаги маданий мероси билан таништиришдан иборат.
Унда милоддан аввалги 7—6-асрларга оид олтиндан ишланган буюмлар, Иссиққўрғонда топилган Сак жангчисининг тўлиқ либоси намойиш этилади.
Кўргазманинг асосий экспонати «Олтин одам» бўлиб, у 1969 йилда Иссиқкўлда топилган. Дафн этилган жойда археологлар умумий ҳисобда яна 4500 та тақинчоқлар топган. Фиравн Тутанхамондан сўнг бу қабрлардан энг кўп миқдорда топилган олтин буюмлар ҳисобланади.
Ҳозирда «Олтин одам» бутун дунёга машҳур бўлиб, Қозоғистон республикаси рамзи ҳисобланади.
Шунингдек, кўргазмада Қозоғистон Миллий музейининг коллекцияларидаги аёллар кумуш тақинчоқлари тўплами намойиш этилади. Унда 19 —20-асрларнинг ўрталарига тегишли бўлган 170 дан ортиқ заргарлик буюмларини ўз ичига олади.
Изоҳ (0)