МИБ Озода Нурсаидованинг Тошкентдаги уйи бузилиши сабабларига аниқлик киритди

Хонанда Озода Нурсаидова уйи бузилганидан кейин шифохонага тушгани ҳақида ОАВда хабарлар берилганди. Мажбурий ижро бюроси ушбу воқеага ойдинлик киритди. 

Маълум бўлишича, Тошкент шаҳрининг Яккасарой тумани, Кўҳинур кўчасида жойлашган турар жой биноси этак қисмида ўзбошимчалик билан қўшиб олинган 178,0 квадрат метр ер майдонида жойлашган қурилма-деворни қарздор Нурсаидова Озода Парпиевнанинг ҳисобидан буздириб ташлаш тўғрисидаги ижро ҳужжати мавжуд бўлган.

Январь ойи охирида давлат ижрочилари томонидан қарздорга ижро ҳужжати талабларини белгиланган вақтда бажармаслик оқибатлари ҳақида тушунча берилган ва бу ҳақда тегишли тартибда далолатнома расмийлаштирилган.

Ижро ҳужжати ижроси берилган ихтиёрий муддатда бажарилмаганлиги сабабли мажбурий ижро ҳаракатлари олиб борилган.

Дастлаб, 6 февралда мажбурий ижро ҳаракатлари Яккасарой тумани ҳокимлиги вакиллари иштирок этмагани сабабли бошқа кунга қолдирилган. Хонадон эгалари томонидан ижро ҳужжатини тўхтатиш ёки бекор қилиш учун асос бўладиган ҳеч қандай ҳужжатлар тақдим қилинмаган, шу сабабли мажбурий ижро ҳаракатлари давом эттирилган.

Шундан сўнг, 8 февралда тегишли мутасадди ташкилотлар вакиллари ва холислар иштирокида ижро ҳужжати ижроси (соат 15.00 дан соат 21.30 га қадар) тўлиқ бажарилиб, 178,0 квадрат метр ер майдондаги ноқонуний қурилма бузилган.

Ижро ҳаракатларини амалга ошириш даврида хонадон эгаси Озода Нурсаидова, синглиси Нилуфар Нурсаидова, туман ҳокимлиги, туман ер ресурслари ва давлат кадастри бўлими, ИИБ ХООБ профилактика инспектори, тез тиббий ёрдам хизмати ҳамда «Боғсарой» МФЙ раиси иштирок этган.

Хонадон эгалари Озода Нурсаидова ва бошқалар кадастр бўлими ходимларига қурилма ўлчами нотўғри ҳисоблангани ҳақида эътироз билдириб, далолатномага имзо чекишдан бош тортган ва бу ҳақда ИИБ ХООБ профилактика инспектори томонидан тегишли тартибда далолатнома расмийлаштирилган.

Мажбурий ижро ҳаракатлари давомида Озода Нурсаидованинг соғлиги ёмонлашгани кузатилмаган, давлат ижрочиларининг ҳаракатига қаршилик кўрсатиш ёки тўсқинлик қилиш ҳолатлари содир этилмаган.

Ижро ҳужжати Қонуннинг 41-моддасига асосан амалда тамомланган ҳисобланади, дейилади МИБ хабарида.