«Дарё»да Қашқадарё вилояти, Қарши туманидаги «Мевазор» маҳалласи аҳолисини қийнаб келаётган чиқинди муаммоси қаламга олинган эди. Мазкур муаммо омма эътиборига ҳавола этилгач, вилоятдаги маъсул ташкилотлар муаммога эътибор қаратди. Мажбурий ижро бюроси Қашқадарё вилояти бошқармаси Жамоатчилик билан алоқалар ва ҳуқуқий ахборот бўлими катта инспектори Гулноза Дилмуродованинг «Дарё»мухбирига билдиришича, «Тоза ҳудуд» Қарши туман филиали ходимлари 12 мартдан 13 мартга ўтар кечаси соат кечки 2:00 дан тонгги 4:00 га қадар икки соат давомида чиқиндини олиб чиқиб кетган.
Қарийб уч ойдан бери олинмаган чиқинди икки соат мобайнида олиб чиқиб кетилгач, 13 март куни муаммо ечими борасида ҳудуд аҳолиси фикрини ўрганиш мақсадида МИБ вилоят бошқармаси, туман бўлими ходимлари, вилоят экология ва атроф муҳитни назорат қилиш бошқармаси ҳузуридаги Санитар тозалаш хизматлари ташкил этиш маркази раҳбари Нурбек Наврўзов ҳамда «Тоза ҳудуд» Қарши туман филиали раҳбари Акром Бобоев ва ходимлари иштирокида йиғилиш ташкил этилди.
«Муаммонинг келиб чиқишида бизнинг айбимиз бор, — дейди «Тоза ҳудуд» Қарши туман филиали раҳбари Акром Бобоев. – Аҳолининг эътирози жуда ўринли. Энди бу ҳолат такрорланмаслигига ваъда берамиз. Ҳар ҳафта чиқиндилар ўз вақтида олиб чиқиб кетилишини назорат қиламиз».
Йиғилишда сўз олган Санитар тозалаш хизматлари ташкил этиш маркази раҳбари Нурбек Наврўзов одатда чиқиндихона аҳоли хонадонларидан 20 метрдан 100 метргача бўлган узоқликда жойлашиши кераклигини айтди.
«Ваҳоланки ушбу кўп қаватли уйлар олдида жойлашган чиқиндихона ва аҳоли хонадони ўртасидаги масофа нари борса 10 метрни ташкил этади, — дейди Нурбек Наврўзов. – Шунинг учун ҳам бу борада туман ҳокимлигига маълум қилган ҳолда чиқиндихонани кўчириш масаласини илгари сурмоқчимиз. Чунки қонунчилигимизга кўра, чиқиндихонани кўчириш ишлари туман ҳокимлиги зиммасидаги масала ҳисобланади».
«Барака топишсин, чиқинди муаммоси ҳал бўлди, — дейди аҳоли вакилларидан Умида Чориева. – Аммо бугунги йиғинда туман ҳокимлигидан ҳеч ким қатнашмагани боис ҳам чиқиндихонани кўчириш масаласи мавҳумлигича қолди. Шу муаммони ҳам ҳал этишса, нур устига нур бўларди».
«Чиқиндихонани «дом»имиз ёнидан кўчиришмаса бўлмайди, — дейди 9/4-уйнинг 1-хонадонида яшовчи Манзура Каримова. – Чунки чиқиндихона ўз номи билан чиқиндихонада. Хонадонимиз ва чиқиндихона ўртасидаги масофа 10 метр ҳам чиқмайди. Болаларим соғлиғи керак менга. Шунинг учун туман ҳокимлигидан илтимос қилган бўлардикки, бу муаммо ҳам эътибордан четда қолмасин».
«Дарё» таҳририяти ҳам ҳокимлик ҳудуд аҳолисининг чиқиндихоналарни кўп қаватли уйлар ёнидан узоқроқ масофага кўчириш борасидаги таклифларига қандай муносабат билдирганлигини билиш мақсадида туман ҳокимлигидан изоҳ кутиб қолади.
Изоҳ (0)