Ўтган йили ёзда Ўзбекистонда кузатилган сув танқислиги билан боғлиқ мураккаб вазият қишлоқ хўжалиги соҳасида айрим муаммоларни юзага келтирган эди, деб ёзади ЎзА.
Хусусан, Тошкент вилоятида жойлашган Чорбоғ, Тошкент ва Оҳангарон сув омборларидаги сув захираси 2017 йилга нисбатан 7 фоизга камайиб, қарийб 400 минг гектар суғориладиган майдондаги экинларни суғоришда ўзига хос қийинчиликлар туғдирганди. Хўш, бу йил аҳвол қандай? Сув омборларида қанча сув захираси мавжуд?
Вилоят сув хўжалиги бошқармаси тақдим этган маълумотга кўра, бугунги кун ҳолати бўйича мазкур сув омборларидаги сув захираси ўтган йилнинг шу даврига нисбатан камайган. Хусусан, айни пайтда Чорбоғ сув омборида 512,5, Тошкент сув омборида 161,47 ва Оҳангарон сув омборида 79,05 миллион метр куб сув захираси мавжуд бўлиб, сув омборларидаги сув захираси 2018 йилнинг мос даврига нисбатан 135 миллион метр кубга камайган.
Ушбу статистик маълумотлар соҳа мутасаддилари зиммасига қўшимча масъулият юклаши табиий. Лекин бу йил тоғларга қор ўтган йилгига нисбатан анча кўп тушгани, қолаверса, баҳорги ёғинли кунлар ҳали олдинда эканини ҳисобга олсак, эҳтиёж ортадиган ёз ойларида сув билан боғлиқ муаммолар бўлмайди, дейиш мумкин.
Изоҳ (0)