Жорий йил 4—6 март кунлари Наманган вилоятининг Чуст, Янгиқўрғон туманлари ва Наманган шаҳар Халқ қабулхоналарида Олий суд раисининг ўринбосари Холмўмин Ёдгоров ва Олий суд судьялари, Бош прокуратура ходимлари аҳолининг жиноий, фуқаролик, маъмурий ва иқтисодий судларга оид мурожаатлари юзасидан сайёр қабуллар ўтказди. Бу ҳақда «Дарё» мухбири хабар бермоқда.
Сайёр қабуллар давомида 102 нафар фуқаронинг мурожаати тингланди. Шундан 12 кишининг аризаси назорат тартибида қабул қилинди, 18 нафар фуқаронинг мурожаати жойида ҳал этилди ва 72 кишига тегишлилиги бўйича мурожаат қилиш ҳуқуқи тушунтирилди.
Ўтказилган сайёр қабулларда маҳалла раислари, нотинч оилалар ва жазони ижро этиш муассасидан озод қилинган, ҳозирда озодликдан маҳрум қилиш билан боғлиқ бўлмаган жазоларни ўтаётган, муқаддам судланган шахслар билан суҳбатлар ўтказилди, 2 та оила яраштирилди.
Олий суд фуқаролик ишлари бўйича судлов ҳайъати томонидан 2 та уй-жой низоси ва оталикка эътироз билдириш ҳақидаги фуқаролик ишлари кўрилиб, якуний қарор қабул қилинди.
Жиноят ишлари бўйича судлар томонидан 4 нафар шахс биринчи инстанция судлари томонидан, 3 нафар шахс апелляция ва 2 нафар шахс кассация инстанцияси томонидан, жами 9 киши суд залидан озод қилинди.
Жиноят ишлари бўйича Чортоқ туман судининг 2016 йил 15 августдаги ҳукми билан судланиб, жазони ўтаётган маҳкум, 1974 йилда Чортоқ туманида туғилган Обиджон Ҳасановнинг жиноят иши унинг адвокати келтирган шикоят асосида Олий суд жиноят ишлари бўйича судлов ҳайъати томонидан сайёр суд мажлисида кўрилиб, О.Ҳасанов суд залидан озод қилинди.
Чуст шаҳрида яшовчи Музаффар Арсланов отаси Жиноят кодексининг 167,168 ва бошқа моддалари билан судланиб, 5 йил ва олти ой муддатга озодликдан махрум этилгани, ҳозирда жазонинг ярмидан кўпини ўтагани, жазони ўташ вақтида бетоб бўлиб қолгани, шу сабабли жазони енгилроғи билан алмаштириб беришни сўраб мурожаат қилди. Ариза назорат тартибида ўрганиш учун қабул қилинди.
Сайёр қабул кунлари ахлоқ тузатиш ишлари ва озодликни чеклаш жазосини ўтаётган 80 нафар шахс Жиноят кодексининг 73-моддаси тартибида ўталмай қолган жазо муддатидан шартли равишда озод қилинди.
Жиноят ишлари бўйича Поп туман суди томонидан Наманган вилоят ИИБ 6-сонли жазони ижро этиш муассасасида сайёр суд мажлиси ўтказилиб, 16 нафар шахс жазони ижро этиш колониясидан озод қилиниб, жазони ўташ учун манзил колонияларига ўтказилди. Бир кишининг ўталмай қолган озодликдан маҳрум қилиш жазоси ЖК 74-моддаси тартибида енгилроқ жазога алмаштирилиб, оиласи бағрига қайтарилди.
Уйчи туманидаги тергов ҳибсхонасида ушлаб турилган шахслар билан ҳам суҳбат ўтказилди. 2 нафар вояга етмаган бола ва 3 нафар жазони ўташ учун қайтариш белгиланган аёлнинг аризаси қабул қилинди. Хусусан, қарамоғида кекса онаси ва 2 ёшли вояга етмаган қизи бўлган, ЖКнинг 131-моддаси билан судланиб, тайинланган мажбурий жамоат ишлари жазоси озодликдан махрум қилиш жазосига алмаштирилган Дилнора Арапованинг шикояти қабул қилиниб, 2019 йил 6 март куни вилоят суди томонидан кўриб чиқилди ҳамда туман судларининг жазони ўташ учун қайтариш ҳақидаги ажримлари бекор қилиниб, у озодликка чиқарилди.
— Жазони ўташ тартибини бузганлигим сабабли 2019 йил февраль ойида ушбу жазо ўзгартирилиб, суд залидан қамоққа олингандим, — дейди қувончдан кўз ёшларини тия олмаган Д.Арапова. — Жазони ижро этаётган жойимизга Олий суд вакиллари келиб, мен ва яна 15 нафар маҳкумлар билан суҳбатлашди. Бошимдан ўтган ҳолатларни гапириб берганимда шикоят ёзишимни тушунтиришди. Ёзган аризам шу куннинг ўзида, яъни 6 март куни жиноят ишлари бўйича Наманган вилоят суди апелляция инстанциясида кўриб чиқилиб, суд залида қамоқдан озод қилишди. Қилган ишимдан пушаймонман ва берилган бу имкониятдан тўғри фойдаланаман. Мени кечирганликлари учун миннатдорлик билдираман.
Намангандаги сайёр қабуллар давомида жами 29 нафар шахс озод қилинди. Улардан 13 нафари суд залининг ўзида қамоқдан чиқарилиб, оиласи бағрига қайтарилган бўлса, 16 нафар шахсга нисбатан жазо енгили билан алмаштирилиб, жазони ўташ жойларидан чиқарилди.
Изоҳ (0)