Тошкент вилоятида жорий йилнинг дастлабки 2 ойида 2 та меҳмонхона, 2 та санаторий ва 1 та дам олиш маскани фойдаланишга топширилди. Бу ҳақда ЎзА хабар бермоқда.
2018 йилда вилоятга 3 миллион 500 мингдан зиёд, жумладан, 550 мингдан ортиқ чет эллик сайёҳ ташриф буюрган, бу кўрсаткич ўтган йилларга нисбатан бир неча баробар кўпдир.
Президентнинг 2019 йил 5 январдаги «Туризм тармоғини жадал ривожлантиришга оид чора-тадбирлар тўғрисида«ги қарори бу борадаги ишларни янги босқичда давом эттиришда муҳим омил бўлаётир. Хусусан, мазкур қарорда ҳар йили хостеллар ва меҳмон уйлари ташкил қилиш дастурини тасдиқлаш, Ўзбекистон Республикаси Қурилиш вазирлиги билан биргаликда шаҳарлар ва аҳоли пунктларини ривожлантириш дастурларини ишлаб чиқишда мамлакатнинг ҳар бир йирик шаҳрида хостеллар ва меҳмон уйлари тармоғининг мавжуд бўлишини таъминлаш бўйича вазифалар белгиланди.
– Вилоятда 68 меҳмонхона, 14 санаторий, 4 хостел, 6 дам олиш маскани, 3 спорт базаси, 3 клиника, 40 меҳмон уйлари фаолият юритмоқда, – дейди Тошкент вилояти туризмни ривожлантириш департаменти бўлим бошлиғи М.Баракаев. – Мазкур масканлар кунига 4 минг 600 га яқин сайёҳни қабул қилиш имкониятига эга. Айни пайтда 62 меҳмонхонада қурилиш ишлари давом этмоқда. Шунингдек, 300 га яқин оилавий меҳмон уйларини ташкил этиш бўйича ҳам тизимли ишлар амалга оширилмоқда.
Айни пайтда вилоятда сайёҳларга кўрсатилаётган хизматлар сифатини ошириш ва турини кўпайтириш, меҳмонхона, санаторий, хостел, кемпинг, дам олиш масканлари, меҳмон уйлари ва ахборот марказлари ташкил этишга ҳам алоҳида эътибор қаратилмоқда. Жумладан, жорий йилнинг дастлабки 2 ойида Чирчиқ шаҳри ва Қибрай туманида 2 санаторий, Қибрай туманида 2 меҳмонхона, Бўстонлиқ туманида дам олиш маскани фаолияти йўлга қўйилди.
Изоҳ (0)