«Ўзбекконцерт» давлат муассасаси томонидан 26 февралдан эътиборан «Браво» жамоаси ва актриса Ҳалима Ибрагимованинг лицензияси тугатилди. Бу ҳақда Sputnik «Ўзбекконцерт» матбуот хизматига таяниб хабар берди.
Маълум қилинишича, «Ўзбекконцерт» давлат муассасасида «Бадиий сўз санъати ва саҳна масъулияти» мавзусида йиғилиш ўтказилган, унда «Браво» жамоасининг лицензияси олиб қўйилди.
«Давра суҳбатида қизиқчи ва сўз усталарининг ижодида кузатилаётган камчилик ва қусурларни бартараф этиш, олдини олиш ва тартибга солиш каби муҳим масалалар кўтарилиши кўзда тутилган», – деб таъкидланди «Ўзбекконцерт» матбуот хизматида.
«Ўзбекконцерт» билан тузган лицензия талаблари ва шартлари қўпол равишда бузилгани, яъни ўтказилган концерт дастурларида муассасага топширилган сценарийдан четга чиқиб, миллий урф-одатлар, одоб-ахлоқ, маънавий қадриятларга ёт бўлган, фаҳшни тарғиб қилувчи ҳажвиялар орқали ўзбек сўз санъати обрўсига путур етказаётгани, ижтимоий тармоқларда санъаткор одобига риоя этмагани учун сўз усталари «Браво» ва Ибрагимова Ҳалима Убайдуллаевналарнинг лицензиялари «Фаолиятнинг айрим турларини лицензиялаш тўғрисида»ги Ўзбекистон Республикаси қонунининг 23-моддаси ҳамда Вазирлар Маҳкамасининг 2015 йил 9 декабрдаги 354-сон қарорининг 1-иловаси билан тасдиқланган Низомнинг 37-бандига асосан 2019 йилнинг 26 февраль кунидан амал қилиши тугатилади», — деб маълум қилинди «Ўзбекконцерт» матбуот хизматида.
Шу билан бирга, сўз усталари («Гап йўқ триоси») Сардор Ташмуҳамедов, Лалиддин Холматов ва Санжар Исабаевлар ёш авлодни маънавий-ахлоқий тарбиялашга салбий таъсир кўрсатадиган мазмунан саёз, мантиқ ва шеърият талабларига жавоб бермайдиган бачкана сўзлар ижросида бўлган «оммавий маданият» ва ахлоқсизлик ғояларини тарғиб этувчи видео клипларни ижтимоий тармоқларда тарқатганлиги учун огоҳлантирилди ҳамда келгусида шу каби ҳолатлар такрорланса, уларнинг лицензиялари ҳам тўхтатилиши маълум қилинди.
Нашр эслатишича, бир неча кундан буён ижтимоий тармоқларда актриса Ҳалима Ибрагимованинг сўкингани тасвирланган видеолар тарқалмоқда.
Изоҳ (0)