Наманганда халқ депутатлари вилоят кенгашининг навбатдаги ўттиз олтинчи сессияси бўлиб ўтди. Бу ҳақда «Дарё»га вилоят ҳокимлиги матбуот хизмати маълум қилди.
Сессияда Олий Мажлис Сенатининг маҳаллий ҳокимият вакиллик органлари фаолиятини кучайтиришга кўмаклашувчи комиссияси раиси Толибжон Мадумаров Сенат Кенгашининг 2019 йил 15 февралдаги «Фуқаролар йиғинлари раислари (оқсоқоллари) сайловига тайёргарлик кўриш ва уни ўтказиш тўғрисида» қарори ижроси ҳақида маъруза қилди.
Фуқароларнинг ўзини ўзи бошқариш органлари фаолиятини мувофиқлаштириш бўйича вилоят кенгаши раисининг биринчи ўринбосари Мусохон Апақов вилоятда сайловга тайёргарлик доирасида амалга оширилаётган ишлар ҳақида ахборот берди.
Вилоят Кенгаши депутатлари ушбу масала бўйича тайёрланган қарор лойиҳасини кўриб чиқиб, маъқуллади ва фуқаролар йиғинлари раислари (оқсоқоллари) сайловини ташкил этиш ва ўтказишга кўмаклашувчи вилоят комиссияси таркибини тасдиқлади.
Вилоят кенгаши сессиясида 4-Умрзақов сайлов округидан сайланган депутат Олимжон Тўхтаназаров суд ҳукмига биноан ҳамда 33-Исоқчўян сайлов округидан сайланган депутат Абдусалом Умаров ваколатини зиммасидан соқит қилишни сўраб берган аризасига кўра уларнинг депутатлик ваколатини муддатидан олдин тўхтатиш тўғрисида қарор қабул қилинди.
Ўрни бўшаб қолган ушбу округларда сайлов ўтказиш 2019 йил 24 март кунига белгиланди.
Эслатиб ўтамиз, халқ депутатлари Наманган вилоят кенгаши депутати Олимжон Тўхтаназаров 2018 йил 22 сентябрь куни Чуст туманида аризачидан 500 АҚШ долларини олган вақтда ашёвий далил билан ушланган.
Жиноят ишлари бўйича Наманган тумани судининг 2019 йил 5 февралдаги ҳукми билан О.Тўхтаназаровнинг қилмиши ЖК 168-моддаси 3-қисми «в» бандидан 168-моддаси 1-қисмига қайта малакаланган. Унга 3 йил муайян ҳуқуқдан маҳрум қилиш, 2 йил 8 ой 31 кун озодликни чеклаш жазоси тайинланган.
Изоҳ (0)