Бухоро вилояти давлат солиқ бошқармаси ташаббуси билан Бухоро шаҳар Саноатчилар кўчасида жойлашган қурилиш материаллари, яъни цемент маҳсулотлари савдоси билан шуғулланаётган хўжалик юритувчи субъектларида конверт усулида ҳақ олиб келаётган 55 нафар ёнланма ишчи ходимларнинг қонуний манфаатлари тикланди. Бу ҳақда вилоят солиқ бошқармаси матбуот хизмати «Дарё»га хабар берди.
«Энди ҳар бир ёлланма ишчи ижтимоий-ҳуқуқий жиҳатдан ҳимояланади. Оғир меҳнат шароитида ишлаб келаётган бу каби фуқароларнинг инсоний қадр-қиммати муҳофаза этилиб, уларнинг меҳнатларини қадрлаш мақсадида, маҳаллий тадбиркорлар томонидан режа асосида ҳар куни ишчиларга иш бошланишидан аввал ва туганидан сўнг сут ва сут маҳсулотларини бепул тарқатиш тизимининг йўлга қўйилганлиги уларнинг хурсандчилигига сабаб бўлмоқда», — дейилади хабарда.
Бугунги кунда мазкур савдо комплексида 14 та хўжалик юритувчи субъектлар фаолият юритмоқда. Бириктирилган солиқ хизмати ходимлари янги концепцияга киритилган ўзгаришларни уларга доимий тарзда тушунтириб бормоқда. Учрашувлар давомида жисмоний шахслардан олинадиган даромад солиғининг амалдаги 4 та поғонали ставкалари ўрнига ягона 12 фоизлик ставка белгиланлиги, пенсия жамғармасига 8 фоизли суғурта бадали бекор қилинганлиги, корхона раҳбарларига ҳамда конверт усулида ҳақ олиб келаётган ишчиларга тушунтирилмоқда ва шу жойда уларни қонуний иш юритиши учун замин яратилмоқда.
«Вилоят мисолида айтадиган бўлсак, хўжалик юритувчи субъектларда ходимларнинг ҳисоботдаги ва ҳақиқий сонининг мувофиқлиги юзасидан ўтказилган мониторингда 1500 га яқин шу каби норасмий, конверт усулида ҳақ олиб келаётган фуқаролар аниқланган. Жойлардаги мавжуд камчиликлар юзасидан давлат солиқ хизмати ходимлари томонидан қонуний фаолият юритишлари учун эса уларга амалий ёрдамалар кўрсатилиб келинмоқда. Бу каби тадбирлар вилоятнинг барча туман ва шаҳарларида давом этмоқда», — дейилади хабарда.
Изоҳ (0)