14 февраль куни Қашқадарё вилояти ҳокимлигида ўтказилган йиғилишда сиёсий фанлар номзоди Беҳзод Жўраев вилоят халқ таълими бошқармаси бошлиғи сифатида таништирилган. Бу ҳақда вилоят ҳокимлиги матбуот хизмати «Дарё»га маълум қилди.
Халқ таълими вазирининг 2019 йил 12 февралдаги буйруғи билан вилоят халқ таълими бошқармасига раҳбар этиб тайинланган Беҳзод Жўраев шу пайтгача Вазирлар Маҳкамаси ҳузуридаги Давлат тест маркази вилоят бўлими бошлиғи вазифасида фаолият кўрсатиб келган.
Бошқарманинг собиқ бошлиғи Лазиз Холов қандай сабабга кўра ишдан олингани хусусида ҳеч қандай маълумот йўқ. Аммо вилоят ҳокимлигидан маълум қилинишича, собиқ бошқарма бошлиғи айни пайтда вилоят ҳокимлигида котибият мудири сифатида ишини давом эттирмоқда.
Шуни алоҳида таъкидлаш лозимки, 2018 йил интернет сайтларида Қашқадарё вилоят халқ таълими бошқармаси тасарруфидаги умумтаълим мактаблари фаолиятига доир кўплаб мақолалар чоп этилган бўлиб, унда умумтаълим мактабларидаги иситиш тизими, сифатсиз кўмир ва ўқувчи ёшларнинг ўз жонига қасд қилиш ҳолатлари тилга олинганди.
Изоҳ (0)