Тижорат банкларига етим ва ота-онаси қарамоғидан маҳрум бўлган болаларга квартира сотиб олиш учун имтиёзли ипотека кредитлари ва тадбиркорлик фаолияти билан шуғулланиш учун кредитлар ажратиш тавсия этилади. Бу Президентнинг «Етим болалар ва ота-онасининг қарамоғидан маҳрум бўлган болаларни ижтимоий ҳимоя қилишни кучайтиришга оид қўшимча чора-тадбирлар тўғрисида» қарорида кўзда тутилган.
Ипотека кредитининг дастлабки бадали Ўзбекистон ёшлар иттифоқи Ривожлантириш жамғармаси маблағлари ҳисобидан тўлаб берилади.
Вазирлар Маҳкамаси шаҳарлар ва қишлоқ жойларида арзон кўп квартирали уйларни қуриш параметрларини шакллантиришда, 2020 йилдан бошлаб уй-жойга бўлган эҳтиёждан келиб чиқиб, етим болалар ва ота-онасининг қарамоғидан маҳрум бўлган болаларга имтиёзли ипотека кредити бериш асосида сотиш учун уйлар қурилишини назарда тутиши белгиланди.
Қорақалпоғистон Республикаси Вазирлар Кенгаши раиси, вилоятлар, шаҳар (туман) ҳокимлари:
«Меҳрибонлик» уйларига кам таъминланган ва кўп болали оилаларнинг болалари ҳамда ота ёки онадан бирига эга болаларни вақтинчалик жойлаштириш бўйича қарорларнинг асослантирилганлиги;
уй-жойга муҳтож сифатида ҳисобда турган етим болалар ва ота-онасининг қарамоғидан маҳрум бўлган болаларга ўз вақтида турар жойлар ажратилишини қонун ҳужжатларига мувофиқ таъминлаш учун шахсий жавобгар эканлиги кўрсатиб ўтилди.
Бош прокуратурага етим болалар ва ота-онасининг қарамоғидан маҳрум бўлган болаларга турар жойлар ажратилиши устидан назоратни кучайтириш топширилди.
Изоҳ (0)