Фарғонада 2019–2020 йилларда 27 та меҳмонхона қуриб битказилади. Бу меҳмонхоналарда 1218 хона ва 2714 ўрин ташкил этилиши кўзда тутилган, деб хабар бермоқда «Дарё» мухбири Азизжон Эрматов.
Президентнинг жорий йил 5 январдаги «Туризм тармоғини жадал ривожлантиришга оид чора-тадбирлар тўғрисида»ги қарори ижросини таъминлаш мақсадида вилоят бўйича умумий қиймати 28,5 миллион долларлик 27 та инвестиция лойиҳаси ишлаб чиқилди. Лойиҳа харажатларининг 17,7 миллиони тадбиркорлар, 2,6 миллиони чет эл инвестицияси, 10,8 миллиони эса кредит маблағлари ҳисобидан амалга оширилиши режалаштирилган.
«2019 йилнинг 6 ойи давомида вилоятда 15 та янги меҳмонхона қуриб битказилади. Қўқон шаҳрида Халқаро ҳунармандчилик фестивали ўтказилиши муносабати билан замонавий талабларга жавоб берадиган 10 та меҳмонхона қурилиши режалаштирилган. Шаҳарнинг Туркистон, Сарбоз, Турон, Боғистон, Янги ҳаёт, Бўрчилик кўчаларида 80 ўриндан 200 ўрингача бўлган меҳмонхоналар қурилиши бошлаб юборилди. Шунингдек, Марғилон шаҳрида 4 та, Риштон, Сўх туманлари марказида биттадан замонавий кўринишдаги меҳмонхоналар бунёд этилади», – дейди вилоят қурилиш бошқармаси бошлиғи ўринбосари Баҳодир Хўжаматов.
Изоҳ (0)