Ўзбекистон Президенти Шавкат Мирзиёев фармони билан Очилбой Раматов Бош вазирнинг биринчи ўринбосари — транспорт вазири этиб тайинланди, деб хабар берди «Газета.uz».
1962 йилда туғилган Очилбой Раматов бунга қадар Бош вазирнинг биринчи ўринбосари, «Ўзбекистон темир йўллари» компанияси бошқарув раиси, ҳукуматнинг ҳудудларни комплекс ривожлантириш ва коммунал соҳа, транспорт, капитал қурилиш ва қурилиш индустрияси масалалари комплекси раҳбари сифатида фаолият юритаётган эди.
Транспорт вазирлигини ташкил этиш тўғрисида ҳали расман эълон қилингани йўқ.
Шавкат Мирзиёевнинг 2018 йил ноябрь ойидаги «Ўзбекистон Республикаси фуқаро авиациясини тубдан такомиллаштириш чора-тадбирлари тўғрисида»ги фармонида 2019 йилнинг 1 июлигача Транспорт вазирлиги тузиш бўйича таклифлар киритиш топширилган эди.
Янги давлат органига «Ўзбекистон темир йўллари» ва «Ўзбекистон ҳаво йўллари» компаниялари ваколатлари ўтиши кўзда тутилмоқда.
2018 йилнинг 28 майидан бери Бош вазир ўринбосари — ҳукуматнинг таълим, соғлиқни сақлаш, жисмоний маданият, спорт ва туризм масалалари комплекси раҳбари сифатида фаолият юритган Азиз Абдуҳакимов эндиликда Бош вазирнинг ижтимоий ривожланиш масалалари бўйича ўринбосари этиб тайинланди.
2017 йилдан бери Бош вазир ўринбосари, Ўзбекистон Республикаси Молия вазири — Макроиқтисодий таҳлил ва прогнозлаштириш, молия ва банк тизимларини ислоҳ қилиш, хусусий тадбиркорлик ва кичик бизнесни ривожлантириш масалалари комплексининг раҳбари сифатида фаолият юритган Жамшид Қўчқоров эндиликда Бош вазир ўринбосари — Ўзбекистон Республикаси Молия вазири этиб тайинланди.
Ўзбекистон хотин-қизлар қўмитаси раиси Танзила Норбоева ўз лавозимини сақлаб қолди.
Изоҳ (0)