31 январь куни Алишер Навоий номидаги киносаройида «Ўзбеккино» Миллий агентлиги буюртмасига биноан тасвирга олинган икки ҳужжатли фильм тақдимоти бўлиб ўтди, деб хабар берди «Халқ сўзи Online».
Улар режиссёр Ҳожимурод Валиевнинг «Ўзбекистон — Ислом цивилизацияси маркази» ҳамда Александр Гамировнинг «Хожа Баҳоуддин Нақшбанд» ҳужжатли фильмларидир.
Айтиш жоизки, уларда Ўрта осиёлик олимларнинг ислом тарихида тутган ўрни ва уларнинг тафсир, ҳадис, калом, фиқҳ, тасаввуф каби диний билимлар ривожига қўшган ҳиссалари ҳақида сўз юритилади.
«Ушбу фильмлар орқали томошабинлар нафақат маданий ҳордиқ олади, балки юртимизнинг нега Ислом цивилизацияси маркази саналиши, соҳада олиб борилаётган ислоҳотларнинг туб моҳияти, шунингдек, етти пир ҳамда уларнинг маънавий ва маданий мерослари тўғрисида ҳам кўплаб маълумотларга эга бўлади. Баҳоуддин Нақшбанд инсонни улуғлашга, унинг мўътабарлигини англаш каби масалаларга жиддий эътибор қаратган. Инсон дин учун эмас, дин инсон учун яратилганлигини эътироф этган. Миллий ғурурни, орият масалаларини кўтаришга интилган. Нақшбанд ғояларидан ёшларга тарбия беришда фойдалансак, уларни тарихий хотирага ҳурмат, инсонларга меҳр-мурувват, меҳнатсеварлик, инсонпарварлик руҳида тарбиялашда қийналмаймиз», — дейди Имом Бухорий Халқаро илмий-тадқиқот маркази бош маслаҳатчиси, фалсафа фанлари доктори, профессор Бахтиёр Тўраев.
Табиийки, ҳужжатли фильм бадиий фильмдан тубдан фарқ қилади. Шунга қарамай, кино маҳсулоти томошабинни зериктирмаслиги, унга маънавий озуқа бериши зарур, дейилади хабарда.
«Фильмни яратишда ғоя билан тасвирнинг бир-бирига уйғунлашуви энг асосий вазифа ҳисобланади. Биз иш жараёнида ‘Τalking head’ (‘Гапирувчи бош’)дан, яъни телевидениеда кенг қўлланиладиган усулдан фарқли равишда камерага ‘нафас беришъга, томошабинни нафақат сўз билан, балки кучли драматик тасвирий ечимлар билан ҳам тутиб туришга ҳаракат қилдик.
Энг мураккаб кадрлардан бири ΧΙV асрни бугунги кунга боғлаш билан боғлиқ бўлди, десам, адашмайман. Боиси, бугуннинг томошабини хориж фильмларидаги сингари динамик тасвирларга ўрганган. Тасвирга олиш мобайнида ҳеч бир жиҳатни, ҳатто энг майда деталларгача ҳам, кўздан қочирмасликка ҳаракат қилдик», — дейди «Хожа Баҳоуддин Нақшбанд» фильми оператори Умид Маликов.
Изоҳ (0)