Бухоро шаҳар истеъмолчилар ҳуқуқларини ҳимоя қилиш жамиятига Жондор тумани, Мохон қишлоғида яшовчи Ш. Рустамов шикоят аризаси билан мурожаат килди. Бу ҳақда «Халқ сўзи» хабар бермоқда.
Маълум бўлишича, Ш. Рустамов Nexia-3 русумли автомашинани шартнома орқали харид қилиш учун Бухоро шаҳри, Ибн Сино кўчасидаги «Умид Савдо файз Инвест» масъулияти чекланган жамиятига 36 миллион 25 минг сўм нақд пул тўлаган, бироқ буюртмадан ҳамон дарак йўқ эмиш. Харидор ўз ҳуқуқини талаб қилиб, жамиятга бир неча маротаба мурожаат қилади. Аммо ҳар гал турли баҳоналар билан истеъмолчига тайинли жавоб берилмайди.
Мазкур шикоят аризаси юзасидан Бухоро шаҳар истеъмолчилар ҳуқуқларини ҳимоя қилиш жамияти ходимлари томонидан изчил ўрганиш ишлари олиб борилди. Пировардида истеъмолчининг қонуний талаби қондирилиб, унинг МЧЖ ҳисоб рақамига қачонлардир ўтказиб қўйган 36 миллион 25 минг сўм нақд пули олиб берилди.
Изоҳ (0)