Ўзбек тили ва адабиёти университети Турк тил қуруми билан ҳам ҳамкорликни йўлга қўйди, энди ўзбек мумтоз адабиёти намуналари кўп нусхада нашр қилинади
Алишер Навоий номидаги Тошкент давлат ўзбек тили ва адабиёти университети ўз имкониятларидан келиб чиққан ҳолда эндиликда халқаро миқёсда фаолият кўрсатишни бошлади. 2019 йилни амалий ишлар билан бошлаган университет жамоаси айни дамда ректор Шуҳрат Сирожиддинов бошчилигида Туркияда бўлиб турибди, деб хабар беради университет матбуот хизмати.
Сафарнинг биринчи кунида Истанбулда жойлашган Турк адабиёти фонди раҳбари Ўзжон Унлу билан илмий ҳамкорлик бўйича шартнома имзоланди. Шу куннинг ўзида Тўпқопи сарой-музейи қўлёзмалар фонди билан ҳамкорлик ўрнатилди. Мазкур шартномага асосан Алишер Навоий ва ўзбек адабиёти намояндаларининг асарларини ҳамкорликда ўрганиш бўйича келишувга эришилди. Сўнгра маъмурий биноси Истанбулда жойлашган Турк дунёси тадқиқот фонди билан ҳам шартнома тузилди.
Сафарнинг иккинчи кунида эса туркиянинг машҳур Карабук университетида «Дунё тамаддунида муҳим ўрин тутган шахслар: Алишер Навоий» мавзусида илмий анжуман бўлиб ўтди. Анжуман Карабук университети Чингиз Айтматов номидаги Турк дунёси тадқиқотлар маркази, «Туркиядаги ўзбек талабалар» жамияти ҳамда Адабиёт клуби билан ҳамкорликда ташкил этилган бўлиб, унинг доирасида Ўзбекистоннинг маданий ёдгорликлари акс эттирилган фотосуратлар кўргазмаси бўлиб ўтди. Анжумандан сўнг Карабук университети ректори билан ҳамкорлик тўғрисидаги шартнома имзоланди.
Шу куни дунёга машҳур Турк тил қуруми билан ҳам ҳамкорлик йўлга қўйилди. Мазкур қурум бошлиғи профессор Гурер Гулсевин ТошДЎТАУ билан суҳбатда келгуси йилларда ўзбек адабиётининг мумтоз намуналари кўп нусхада нашр қилиш, замонавий ўзбек адабиётини тарғиб қилиш борасида салмоқли ишлар амалга оширилишини қайд этди.
Қолаверса, Анқара шаҳридаги машҳур Хожа Байрам Вали университети билан ҳам мустаҳкам ҳамкорлик ўрнатилди. Икки томонлама шартнома имзоланиб, ҳамкорликнинг истиқбол режалари муҳокама қилинди.
Кўжатепа Афён университети ҳам ТошДЎТАУнинг яқин ҳамкорларидан бирига айланди. Мазкур университет билан сиёсацҳунослик фанлари доирасида манфаатли лойиҳаларни амлга ошириш кўзда тутилган.
Маълумот учун, бугунги кунга келиб, ТошДЎТАУ Ўзбекистонда 18 та ва хориждаги 18 та ОТМларда мавжуд турдош йўналишларга таянч ҳисобланади.
