Бухорода таркибида тилла кукуни бўлган қумдан тилла заррачаларини ажратиб олиб, уни қуйма олтин ҳолатига келтиришга мўлжалланган яширин корхоналар фаолият юритаётгани аниқланди. Бу ҳақда Бош прокуратура ҳузуридаги департаментнинг Бухоро вилоят бошқармаси матбуот хизматига таяниб, «Turon 24» хабар берди.
Маълум қилинишича, «Навоий тоғ-кон металлургия» комбинати таркибида тилла кукуни бўлган катта миқдордаги қум уюмини Зарафшон чўл тизмасининг белгиланган ҳудудида тўплаб боради. Бу қумлар тоғи келажакда таркибидан тилла ажратиб олиш ва яна қайта ишлов беришга мўлжалланган.
Шофиркон туманидаги Назаробод, Қайроғоч, Боғишамол ва Паттахон МФЙда яшовчи 30 нафардан ортиқ фуқаро шундай қумларни айланма йўллар орқали ташиган. Улар узоқ вақтдан буён қум таркибидан тилла заррачаларини ажратиб олиб, уни қуйма олтин ҳолатига келтиришга мўлжалланган яширин цехлардан фойдаланган. Бундан ташқари, қуйма тиллани харид қилиш ҳамда буюртмачиларга етказиб бериш билан ҳам шуғулланиб келган.
Бухоро вилоят ИИБ, прокуратура бошқармаси, давлат солиқ инспекцияси, Бош прокуратура ҳузуридаги иқтисодий жиноятларга қарши курашиш департаменти вилоят бошқармаси билан ҳамкорликда Шофиркон туманида 235 та манзилда текширувлар олиб борилган ва 20 та жиноий ҳолатга ойдинлик киритилган.
Натижада 30 нафардан ортиқ шофирконликларнинг узоқ йиллардан буён шундай ноқонуний йўллар билан бойлик орттириб келишаётгани фош этилган. Аниқланган барча жиҳозлар тегишли тартибда ашёвий далил сифатида ҳужжатлаштириб олинган.
Аниқланган ҳолатлар бўйича Маъмурий жавобгарлик тўғрисидаги Кодекснинг 165-моддаси бўйича 30 нафар фуқарога нисбатан қонунда белгиланган жазо чоралари қўлланилган.
Изоҳ (0)