«Ўзбек халқ ижоди ёдгорликлари» 100 жилдлик китоби нашр қилинмоқда

«Ўзбек халқ ижоди ёдгорликлари» 100 жилдлик китоби нашр қилинмоқда. Бу ҳақда «Халқ сўзи» хабар берди.

Олимлар томонидан ҳозирги кунга қадар мазкур юз жилдликнинг 50 дан ортиқ жилди нашрга тайёрланди. Ғафур Ғулом номидаги нашриёт-матбаа ижодий уйи томонидан 2015 — 2018 йилларда унинг дастлабки 13 жилди чоп этилди.

Жорий йилда «Ўзбек халқ ижоди ёдгорликлари» 100 жилдлигининг етти жилди ва жанубий Тожикистонда яшовчи ўзбекларнинг эртакларидан тузилган «Донишманд Искандар» номли 50-жилди нашрга тайёрланди.

Мазкур 100 жилдлик ўзбек халқ оғзаки поэтик ижоди асарларининг энг мукаммал намуналарини қамраб олади. Ушбу нашрнинг 59 жилди достонлар, 10 жилди халқ қўшиқлари, 12 жилди эртаклар, қолган жилдлар эса терма, афсона, ривоят, нақл, мақол, топишмоқ, аския, лоф, латифа, оғзаки драма, болалар фолклори ва бошқа жанрлардан иборат бўлади.