23 декабрнинг асосий янгиликлари — «Дарё» дайжестида.
Шавкат Мирзиёев марҳум жамоат арбоби Мадаминжон ота хонадонига бориб, оиласига ҳамдардлик билдирди.
Йирик жамоат арбоби, «Нуроний» жамғармасининг таниқли вакили, Иккинчи жаҳон уруши қатнашчиси Мадаминжон ота Ҳасанов шу йил 22 декабрь куни 94 ёшида вафот этди. Президент Шавкат Мирзиёев 23 декабрь куни Мадаминжон ота хонадонига ташриф буюриб, унинг фарзандлари ва яқинларига ҳамдардлик билдирди.
***
Руслан Нурудинов допинг можароси сабаб дисквалификация қилинди.
2012 йил ўтказилган Лондон Олимпиадасида иштирок этган 5 нафар оғир атлетикачининг допинг тести натижалари ижобий натижа берди
Допинг тест ижобий натижа берган спортчилар орасида Рио—2016 Олимпиадаси чемпиони, ўзбекистонлик Руслан Нурудинов ҳам бор. Нурудинов Лондон Олимпиадасида 4-ўрин билан кифояланганди.
***
Актриса Муқаддас Саъдуллаева ўғил фарзандли бўлди, унга Абубакир деб исм қўйишди.
Аввалроқ актёрлар Йигитали Мамажонов ва Муқаддас Саъдуллаева турмуш қургани ва фарзанд кутаётгани хабар берилган эди.
Актрисанинг биринчи турмушидан Саъдия исмли қизчаси, Йигиталининг эса аввалги турмушларидан уч нафар фарзанди бор.
***
23 декабрь, якшанбага ўтар кечаси Ява ва Суматра ороллари оралиғидаги Зонд бўғозида юз берган цунами оқибатида ҳалок бўлганлар сони 222 кишига етди. Жароҳатланганларнинг сони эса 843 нафарни ташкил этмоқда.
Президент Шавкат Мирзиёев Индонезия қирғоқларида юз берган кучли тцунами оқибатида кўплаб инсонлар ҳалок бўлгани муносабати билан мамлакат президенти Жоко Видодога ва Индонезия халқига чуқур ҳамдардлик билдирди.
***
Тошкент кўчалари бўйлаб ҳарбий оркестр садолари янграмоқда.
Ўзбекистон Қуролли Кучлари академияси ҳарбий оркестри ва бир гуруҳ курсантлардан ташкил топган «Ҳарбий ватанпарварлик карвони» Тошкент шаҳрида жойлашган «Чорсу» савдо мажмуаси ҳамда Миробод тумани деҳқон бозорида ўзгача концерт дастурини намойиш этди.
Бундан ташқари, пойтахт маркази – «Мустақиллик» ва «Амир Темур» хиёбонлари, қатор бозорлар ҳудудида Мудофаа вазирлиги Марказий ҳарбий оркестри ижросида янграган наволар барчанинг эътибор марказида бўлди.
Изоҳ (0)