Тошкентдаги Алишер Навоий номли киносаройда режиссёр Зулфиқор Мусоқовнинг Иккинчи жаҳон уруши ҳақида ҳикоя қилувчи «Берлин — Оққўрғон» фильминг ёпиқ тақдимоти бўлиб ўтди, деб хабар берди «Podrobno.uz».
Ушбу картина Ўзбеккино» Миллий агентлиги, «Ўзбекфильм» ДУК буюртмасига асосан суратга олинган.
Қайд этилишича, мазкур фильмда 1941-1945 йилларда кечган Иккинчи жаҳон урушида ўзбек миллатининг жасур ва мард ўғлонлари, шунингдек, фронт ортидаги Ўзбекистон халқининг кўрсатган беминнат меҳнатлари ҳамда инсонийлик муносабатлари акс эттирилган.
Зулфиқор Мусоқов ушбу фильм устида етти йил ишлади. Унинг сценарийси 2011 йилда ёзилган эди.
Фильм воқеалари Москва, Берлин ва фильмнинг бош қаҳрамонларидан бири Қўзивой туғилиб ўсган Оққўрғон туманида юз беради.
Картинада бош ролларни Ҳасан Шуҳратов, Раъно Шодиева, Тўти Юсупова, Нигора Каримбоева, Шаҳзода Матчонова, Кристина Корубко ва бошқалар ижро этган.
Фильмнинг таъсирли эпизодларидан бири немис офицери Клаус ўзи севган яҳудий миллатига мансуб Дебора исмли аёл ва унинг оила аъзоларини шафқатсизларча отиб ташлашидир. Деборанинг ушбу фожиада тасодифан тирик қолган набираси бутун ҳаётини Клаусни излашга бахшида этади. У Клаусни топганида немис офицери қариб қолган ва касал эди. Деборанинг невараси ўзи содир этган жиноятни Клаусга эслатади ва уни отиб ташлайди.
Фильмнинг катта премьераси 20 декабрь куни Алишер Навоий номли киносаройда бўлиб ўтади.
Изоҳ (0)