Тошкентнинг Чилонзор тумани ҳокими Сарвар Маҳаметовнинг уйида бир неча киши йирик ўғриликни амалга оширди, деб ёзади «Газета.uz» Бош прокуратурага таяниб. Ҳодиса 5 декабрь куни юз берган.
Ушбу ҳолат бўйича Юнусобод тумани ИИБ томонидан Жиноят кодексининг 169-моддаси 4-қисми «а» банди (жуда кўп миқдорда содир этилган ўғрилик) билан жиноят иши қўзғатилди.
Суриштирув тадбирлари натижасида 7 декабрь куни уч нафар гумонланувчи ҳибсга олинган. Улардан бирининг уйи тинтув қилинганида далилий ашёлар топилган.
9 декабрь куни ҳибсга олиш эҳтиёт чораси қўлланилган.
Жабрланувчи шахс сифатида Чилонзор тумани ҳокимининг рафиқаси иштирок этмоқда.
Сарвар Маҳаметов туманга шу йилнинг октябрида ҳоким этиб тайинланган. 2010—2016 йилларда у Бектемир тумани, 2016—2018 йилларда Яккасарой тумани ҳокими бўлиб ишлаган.
Изоҳ (0)