Халқ таълими вазири ўринбосари Отабек Назиров 4—5 декабрь кунлари Қашқадарё вилоятининг Чироқчи туманидаги умумтаълим мактабларида бўлиб, тумандаги 2-мактабнинг 5-синф ўқувчиларига инглиз тилида дарс ўтди. Бу ҳақда вилоят халқ таълими бошқармаси бошлиғи ўринбосари Мақсуд Панжиев маълум қилди, деб ёзади Turon24.
«Ўқувчилар учун вазир ўринбосарининг дарс ўтгани эсда қоларли воқеа бўлди, – дейди 2-мактаб директори Баҳодир Эштемиров. – Вазир ўринбосари ўқувчиларга Халқ таълими вазирлиги номидан проектор ва ноутбук совға қилди».
Вилоят халқ таълими бошқармаси мутасаддисининг маълум қилишича, вазир ўринбосари ташриф давомида тумандаги 4 та мактаб ўқувчиларига вазирлик ҳомийлиги билан ташкил этилган проектор ва ноутбукларни топширган.
«Отабек Анварович вилоятимизга ташрифи давомида тумандаги 3-, 24- ва 140-мактабларда ҳам бўлиб, ўқувчиларга яратилган шароитлар билан танишди», — деди Мақсуд Панжиев.
Тумандаги 2-умумтаълим мактаби директори Баҳодир Эштемировнинг айтишича, Отабек Назиров мактаб ўқувчилари учун спорт анжомлари ва футбол тўпларини ҳам совға қилган.
«Вазир ўринбосари мактабимизда баскетбол спорт турини ривожлантириш таклифини ўртага ташлади, – дейди директор Баҳодир Эштемиров. – Вилоятдаги масъул ходимларга мактабда баскетболни ривожлантириш учун шарт-шароит ҳозирлаш хусусида кўрсатма берди».
Вазир ўринбосари, шунингдек, ўқувчилар давомати ва мактаб формасига алоҳида тўхталиб, таълим муассасаларининг иситиш тизимини ҳам кўздан кечирган.
Изоҳ (0)