Мажбурий ижро бюроси Шайхонтоҳур туман бўлими ва туман прокуратураси ходимлари ҳамкорликда тезкор тадбир ўтказди. Бу ҳақда «Дарё»га Мажбурий ижро бюроси хабар берди.
Маълум бўлишича, Тошкент шаҳар, Шайхонтоҳур туман, Қоратош кўчасида қандолат маҳсулотлари ишлаб чиқариш цехида тадбиркор А.В. электр энергиядан ноқонуний фойдаланиб, 116 900 000 сўм етказилган зарарни камайтириб кўрсатиб, тўлов учун 5.000.000 сўм ҳамда мазкур тўпланган ҳужжатлар бўйича жиноят иши қўзғатмаслик эвазига суриштирувчи М.Сиддиқжоновга пора тариқасида 5.000.000 сўм, жами бўлиб 10.000.000 сўм берган вақтида ашёвий далиллар билан қўлга олинган.
Тадбиркор А.В.га нисбатан шу куни Жиноят Кодексининг 211-моддаси 1-қисми билан жиноят иши қўзғатилиб, ҳозирда тергов ҳаракатлари олиб борилмоқда.
Шунингдек, МИБ томонидан 1 декабрь куни ўтказилган яна бир тадбир давомида, Шайхонтоҳур туманидаги Ипакчилик илмий тадқиқот институти бош энергетиги И.Н., институтнинг электр энергиясидан ноқонуний фойдаланиши аниқланиб, қоидабузарлик бўйича 399.170.112 сўм етказилган зарарни камайтириб кўрсатган. И.Н. МИБ туман бўлими суриштирувчига пора тариқасида 2.000 АҚШ доллари беришини маълум қилиб, шундан 450.000 сўм берган вақтида ашёвий далиллар билан қўлга олинган.
И.Н.га нисбатан Жиноят Кодексининг 211-моддаси 1-қисми билан жиноят иши қўзғатилиб, ҳозирда тергов ҳаракатлари олиб борилмоқда.
Изоҳ (0)