Германияда 1944—1945 йилларда Австрия ҳудудидаги Маутхаузен концлагерида қўриқчи бўлиб ишлаган 95 ёшли Ҳанс Х.га нисбатан айблов эълон қилинди. Бу ҳақда Meduza хабар бермоқда.
Прокурорлар уни 36 минг 233 кишининг ўлимига алоқадорликда айбламоқда — у хизмат олиб борган вақтда лагерда айнан шунча одам ҳалок бўлган. Тергов талқинига кўра, Ҳанс Х. ўз фаолияти билан бу одамларни ўлдиришга кўмаклашган.
«У қатлларнинг барча услублари ва маҳбуслар ҳаётининг даҳшатли шароитларидан бохабар бўлган», — дейилади прокуратура баёнотида.
Суд органлари энди Ҳанс Х. суд олдида жавоб беришга қобилми ёки йўқ — шу масалага аниқлик киритиши лозим.
Германия қонунлари нацистлар режими томонидан одамларни ўлдиришда бевосита қатнашмаган, бироқ улар билан ҳамкорлик қилган одамларни жавобгарликка тортиш имконини беради. Сўнгги йилларда концлагерларда ишлаган бир неча кекса кишига нисбатан айбловлар эълон қилинди; уларнинг икки нафари қамоқ жазосига ҳукм қилинди, бироқ улар ҳукм ижросига қадар вафот этди.
Изоҳ (0)