Самарқандлик тадбиркор Сиёб бозори ҳудудида тартиб бўлишини истаётганлиги тўғрисида хабар берган эдик. Бугун мазкур масала юзасидан Самарқанд шаҳар ҳокимлиги томонидан ишчи гуруҳ ташкил этилиб, Сиёб бозоридаги ҳолатлар атрофлича ўрганиб чиқилди. Ишчи гуруҳ аъзолари билан биргаликда «Дарё» мухбири Фарҳод Норбўтаев ҳам бозордаги ҳолатни ўрганди.
Самарқанд шаҳар ҳокимининг иқтисодиёт ва тадбиркорлик масалалари бўйича биринчи ўринбосари Талантжон Эсиргапов бошчилигидаги ишчи гуруҳи дастлаб мақолада келтирилган кўчма дўконларнинг қонуний фаолиятига аниқлик киритди. Ўрганишлар жараёнида бозор ташқарисидаги мавжуд 6 та дўконнинг 3 таси тегишли рухсатномага эга бўлмасдан туриб фаолият юритаётганлиги аниқланди.
Шунингдек, бозорнинг ички ҳудудидаги мавжуд 5 та кўчма дўконнинг 3 таси ҳам тегишли рухсатномасиз фаолият юритаётганлиги ойдинлашди.
Аниқланган ҳолатлар юзасидан тегишли тартибда далолатнома тузилиб, мазкур кўчма савдо дўконлари аҳоли бозорга келиш имконияти кам бўлган жойларга кўчирилди.
Тадбиркор Элмурод Мардиевнинг мурожаати асосида Сиёб бозори ҳудудидаги ҳолатни ўрганиш жараёнида бозор ҳудудидаги кўчма дўконлар масаласи юзасидан бозор раҳбари Солижон Ўсаров «Ҳокимият бозор олдида кўчма дўконда савдо қилиш учун рухсат берган, бироқ, Сиёб бозори маъмуриятида бу борада ҳеч қандай ҳужжат йўқ. Аниқроғи, бозорнинг кириш қисмида кўчма дўкон бўйича бозор маъмуриятининг розилиги сўралмайди» деб жавоб берган эди. Самарқанд шаҳар ҳокимининг иқтисодиёт ва тадбиркорлик масалалари бўйича биринчи ўринбосари Талантжон Эсиргапов билан бўлиб ўтган суҳбатдан сўнг Солижон Ўсаровнинг сўзлари ўз тасдиғини топмади.
«Кўчма савдо дўконларига ҳокимлик томонидан тадбиркорлик фаолиятини юритиш учун фақат гувоҳнома берилади. Бу эса тадбиркор исталган жойида савдо қилишини билдирмайди. Кўчма дўконларни бозор ҳудудида жойлашишини бозор маъмурияти белгилаб беради, — дейди Талантжон Эсиргапов. — Кўчма дўконларнинг фаолият юритишида ҳам ўз талаблари бор. Хусусан, улар эрталаб келиб кечда яна дўконини олиб кетиши лозим. Қолаверса, сотиладиган маҳсулотлар ҳар куни ДСЕНМ ва ветеринария текширувидан ўтказилиши шарт».
Сиёб бозори ҳудудида тартиб сақлаш, бозорга келаётган харидорлар билан бир қаторда туристлар учун ҳам қулай шарт-шароит яратиш мақсадида уч кун муддат ичида барча савдо дўконлари бозор расталарига ўтказилиш бўйича топшириқ берилди. Эътиборли томони шундаки, эндиликда бозордаги маҳсулотлар турига қараб расталарга жойлаштирилади. Шунингдек, дўконларнинг ташқарисидаги савдога ҳам барҳам берилади. Бу борада бозордаги тадбиркорлар огоҳлантирилиб чиқилди.
«Эндиликда бозорнинг ҳар бир ҳудудига бозор маъмуриятининг мутасадди вакилларидан ташқари Ички ишлар ва солиқ инспекциясининг ходимлари ҳам бириктирилди. Улар мунтазам равишда бозордаги тартибни назорат қилиб боради», — дейди Талантжон Эсиргапов.
Изоҳ (0)