Ўзбекистонда россиялик сайёҳлар оқими 1,3 марта кўпайгани айтилмоқда, аммо Россия туроператорлари ва расмий статистика бундай динамикани қайд этмаяпти, деб ёзади «РИА Новости».
Ўзбекистоннинг Россиядаги элчиси Ботиржон Асадов мамлакат сайёҳлик салоҳиятига бағишлаб Новосибирскда ўтказилган тақдимотда Ўзбекистон 2018 йилнинг январидан сентябригача 350 минг россиялик туристни қабул қилгани, бу ўтган йилнинг шу даврига нисбатан 1,3 марта кўп эканлигини маълум қилган эди.
Бироқ Россия Федерал хавфсизлик хизмати Чегара хизмати маълумотларига кўра, 2018 йилнинг уч чораги давомида Ўзбекистонга жами чиқиш туристик оқими 128 808 кишини, туризм мақсадидаги оқим эса — 27 158 кишини ташкил қилди (йиллик ҳисобда 25,9 фоизга кўп).
«Айни пайтда Ўзбекистон реклама йўқлиги туфайли, сайёҳлик йўналиши сифатида кўпчилик туристларга маълум эмас. Иккинчи омил ташув ҳисобланади: авиапарвоз анча қиммат, тарифлар 18 мингдан бошланади, темир йўл билан сафар эса узоқ давом этади ва ноқулай», — дейди миллий йирик туроператорлардан бирининг экспертлари.
Туроператорлар маълумотларига кўра, Ўзбекистон йўналишида бугунги кунда фақат экскурсия турлари талабгирдир. Ушбу мамлакатдаги ҳордиқнинг бошқа турлари сайёҳларни кўп қизиқтирмайди, бу эса ушбу маҳсулотлар ҳақидаги маълумотнинг йўқлиги билан боғлиқ.
Изоҳ (0)