2018 йилнинг 10 ноябрь куни Мактабгача таълим вазирлигида идора фаолиятининг бир йиллигига бағишланган тадбир бўлиб ўтди. Унинг доирасида матбуот-анжумани ўтказилди ва Мирзо-Улуғбек туманининг 324-сонли MTMга пресс-тур уюштирилди. Бу ҳақда «Nuz.uz» хабар бермоқда.
ОАВ вакиллари Мирзо-Улуғбек туманидаги 324-сонли MTMга ташриф буюрди. Ушбу муассаса хорижий инвестиция ёрдамида амалга оширилди. Кўп йиллар фаолият кўрсатмай турган 324-сонли MTMнинг реконструкцияси Сожонг университети ва Кореянинг New Millenium Construction компанияси томонидан молиялаштирилди.
Вазирлик матбуот хизматининг маълум қилишича, айни дамда Корея, Туркия, Сингапур ва бошқа мамлакатлар инвесторлари билан республика MTMларининг моддий-техник базасини яхшилаш, муассасалар тармоғини кенгайтириш бўйича ҳамкорликда иш олиб борилмоқда.
Қайта таъмирлаш давомида мазкур муассаса корейс стандартларига максимал даражада яқинлаштирилиб, қайта барпо этилди.
MTM ҳудуди ва ундаги ўсимликлар болаларнинг минтақавий ва ёши хусусиятлари ҳисобга олиниб «Илк қадам» давлат таълим дастури асосида моделлаштирилган.
Мактабгача таълим муассасаси ҳомийларнинг маблағлари ҳисобига Жанубий Кореядан келтирилган мебель, спорт ва ўйин анжомлари, ўқув-услубий материаллар, ўйинлар ва ўйинчоқлар, шунингдек, болаларнинг тиш чўткаларини стерилловчи қурилмалар билан жиҳозланган.
324-сонли MTM давлат муассаси бўлиб, унга яқин ўртадаги маҳаллалар оилаларининг фарзандлари ва мактабгача таълим тизими ходимларининг болалари қатнайди. Ушбу MTM 2019 йили Тошкентда очилиши кутилаётган Сожонг университети филиалининг ўқитувчи ва талабалари учун кейинчалик тажриба майдончаси сифатида хизмат қилиши кўзда тутилган. Бу MTMда йўлга қўйилган янгича таълим ёндашувига оид амалиётларни шунгдек бутун республика педагоглари ҳам қўллашлари мумкин бўлади.