Ўзбекистон Украинадан дорилар импортини тўхтатиб қўйди

Украина дори ишлаб чиқарувчилари Ўзбекистонга киритиш учун дори воситаларини божхонадан ўтказа олмаяпти. Бу ҳақда Украина тиббиёт ва микробиология саноати иш берувчилар ташкилотлари бирлашмаси маълум қилди, деб ёзади «Nuz.uz».

Сўнгги ҳафталар давомида фармацевтика маҳсулотлари божхонада туриб, аммо Ўзбекистон божхона хизмати улар нима учун расмийлаштирилмаётганини изоҳламаяпти.

Бундай муаммога «Юрия-Фарм» МЧЖ, «Фармак» ОАЖ, «Лекхим» АЖ, «Фармхим» МЧЖ каби фармацевтика компаниялари дуч келди.

Таъкидланишича, божхона расмийлаштируви жараёнининг тўхтатилиши Ўзбекистон ҳукуматининг Украина томонидан Ўзбекистондан Украинага енгил автомобиллар импортига нисбатан аксилсубсидия текшируви ўтказилишига жавобидир.

Шу муносабат билан Бирлашма Украина бош вазири биринчи ўринбосари — иқтисодий ривожланиш ва савдо вазири Степан Кубивга мурожаат қилиб, вазиятга аралашишни ва ушбу масалани ечиш йўлларини ишлаб чиқиш бўйича ишчи мажлис ўтказишни сўради.