«Евросиё қироличаси — 2016» танловида ғолиб чиққан туркиялик модель 13 йиллик қамоқ жазосига ҳукм қилинди. Бу ҳақда Daily Mirror хабар берди.
25 ёшли Сибел Демиралп ва унинг шериклари одам ўғирлашда, зўрлик билан пулларга эгалик қилиш ва кредит карталаридан фойдаланиш билан боғлиқ жиноятларда айбдор деб топилган.
Собиқ гўзаллик қироличаси заргарлик дўкони эгасининг шикоятига асосан ҳибсга олинган. Дўкон эгаси қизни товламачиликда айблаган. Эркакнинг сўзларига кўра, у қиз билан интернетда танишган. Қиз уни нонуштага таклиф қилган, бироқ учрашув жойида эркак қопқонга дуч келган.
Кўрсатилган манзилда заргарни беш нафар эркак кутиб турган. Улар куч ишлатиб, заргарни ечинтирган, уни яланғоч ҳолда суратга олган ва агар пул тўламаса, суратларни эълон қилиш билан таҳдид қилган. Заргар кредит картасидан пул ечишга ва уларга 250 минг лира (45 минг доллар) беришга мажбур бўлган.
Изоҳ (0)