Қозоғистондаги Hit tv каналининг йўқолган журналисти ўлик ҳолда топилди

Журналист Айгерим Мусаева оилавий жанжалдан сўнг йўқолиб қолган эди, деб хабар беради «Tengrinews».

Унинг жасади Олмаота шаҳрининг Турксибск туманидан топилди.

«20 октябрь куни соат 00:20 да Турксибск туманидан ўтган темирйўлдан ёш аёлнинг жасади топилди. Аёлни тепловоз уриб кетгани аниқланди. Жасаднинг ёнидан шахсни тасдиқловчи ҳужжатлар топилмаган. Суд-тиббий экспертиза ўтказиш учун жасад шаҳар ўликхонасига юборилди», — дейилади хабарда.

Кейинроқ марҳуманинг жасадини унинг укаси таниган.

Маълум бўлишича, 20 октябрь куни соат 17:05 да аёлнинг турмуш ўртоғи милицияга қўнғироқ қилиб, 1991 йилда туғилган рафиқаси Айгерим Мусаеванинг оилавий жанжал оқибатида уйдан чиқиб кетиб, қайтмаганлигини маълум қилган.

Ҳозирда ҳолат юзасидан суриштирув ишлари олиб борилмоқда.