Турк ва ўзбек киноижодкорлари иштирокида ўтказилган анжуманда Меҳмет Бўздағ «Ўзбекистон Президенти томонидан Самарқандда туркий халқлар кинофестивали ташкил қилиниши тарафдори» эканини билдирди, деб ёзади Turon 24.
Турк делегациясининг ташрифидан асосий мақсад «Жалолиддин Мангуберди» тарихий сериалини ўзбек киночилари билан биргаликда суратга олишдир. Делегация «Текден фильм» ва «Бўздағ фильм» бошқарув кенгаши раиси Меҳмет Бўздағ, «Симит Сарайи» бренди соҳиби, йирик инвестор тадбиркор Холуқ Ўқутур, инвестор Умар Сайфи Актулун, Стратегик тафаккур институти васийлик кенгаши аъзоси, «Дирилиш-Эртуғрул» сериалининг илмий маслаҳатчиси Синан Товуқчидан иборат.
Меҳмет Бўздағнинг айтишича, «Эртуғрул» сериалини 2 млрд одам томоша қилди. Венесуэла раҳбари сериал олиш жараёнини кузатди. Эртуғрул ўзбек саркардалари Жалолиддин Мангуберди, Амир Темур каби адолат учун курашган. Бирор-бир лойиҳа Жалолиддинчалик бизни ҳайратга солмади. Жалолиддин ҳақида фильм оладиган бўлсак, уни дунё кўрадиган даражада олишимиз шарт».
Шунингдек, Бўздағ фильмларга кастинг жараёнлари хусусида гапириб ўтди:
«Ҳар йили икки мингдан ортиқ актёр орасида кастинг уюштирамиз. Танланган актёрни фильм ғоясидан келиб чиқиб тайёрлаймиз. Тоққа чиқиш, от миниш, югуриш, курашиш – барчасини батафсил ўргатамиз. 120 дақиқалик серияни суратга олиш учун 6 кун сарфлаймиз. Бу жуда тез фурсат. Аммо шундай бўлса-да, фильмнинг ҳар бир деталига аҳамият беришга ҳаракат қиламиз».
Маълумот учун, Меҳмет Бўздағ 1983 йил 1 январда Туркиянинг Қайсери вилоятида дунёга келди. Сакаря университетининг тарих факультетида таҳсил олган. «Сўнгги туш» (2009), «Усталар, олимлар ва султонлар» (2010), «Тирилиш. Эртуғрул» (2015) каби фильмларнинг сценарий муаллифи ва режиссёри.
Изоҳ (0)