«Ипак Йўли» банкига кичик ва хусусий бизнесни кредитлаш учун 20 млн АҚШ доллари берилди.
ЕТТБ Ўзбекистондаги кичик ва хусусий бизнесни қўллаб-қувватлаш учун ўзининг илк синдикат кредитини ажратади.
«Ипак Йўли» акциядорлик инновацион тижорат банки ва Европа Тикланиш ва Тараққиёт банки (ЕТТБ) 15 октябрь куни 20 млн. АҚШ доллари ҳажмидаги кредит битимини имзоладилар.
ЕТТБ мамлакатга янги маблағ ажратиш ҳамда ўз молиявий воситачилари сонини ошириш орқали Ўзбекистонда хусусий тадбиркорликни қўллаб-қувватлашни давом эттирмоқда. ЕТТБнинг 20 млн АҚШ доллари қийматидаги илк синдикат кредити республикадаги йирик тижорат банкларидан бири — «Ипак Йўли» банкига берилади.
Кредитикки қисмдан иборат бўлиб, 10 млн. АҚШ долларигача бўлган биринчи қисмини ЕТТБнинг ўз маблағлари ташкил қилади, кредитнинг 10 млн. АҚШ доллари ҳажмидаги иккинчи қисми Нидерландия Тараққиёт банки (ФМО) маблағлари ҳисобига шакллантирилади.
Ҳужжатни ЕТТБ томонидан ЕТТБнинг МДҲ мамлакатлари бўйича директори Наталя Ханженкова,«Ипак Йўли» банки томонидан Бошқарув раиси Саидаброр Сайдахмедов имзолади.
Битим, шунингдек «Ипак Йўли» банки кичик ва хусусий бизнесни кредитлашнинг турли соҳаларини, шу билан бирга Ўзбекистонда молиявий институтларни ривожлантириш дастури доирасида таваккални бошқаришни қамраб олувчи махсус техник ёрдам ҳам олади.
ЕТТБ кредити «Ипак Йўли» банкига ўзининг молиялаштириш базасини диверсификациялаш, кичик ва хусусий бизнеснинг мижозлар базасини кенгайтириш ва мамлакат корхоналари учун бир мунча узоқроқ муддатда қайтариш имкониятига эга бўлган кредитлар таклиф қилишга ёрдам беради. Кредитларни АҚШ доллари ёки миллий валютада тақдим этиш мумкин бўлади.
«Ипак Йўли» банкининг ЕТТБ билан ҳамкорлигига 2001 йили пойдевор қўйилган бўлиб, микро ва кичик корхоналар учун микрокредитлаш дастурини жорий этиш бўйича банкка ёрдам кўрсатишдан бошланган эди.
«Ипак Йўли» банки ўз мижозлари учун истиқболли лойиҳаларни молиялаштириш манбаларини танлаш имкониятини таъминлаш мақсадида халқаро ва хорижий молия институтлари билан жипс ҳамкорлик қилиб келмоқда.
«Ипак Йўли» банки 1990 йили асос солинган универсал тижорат банки ҳисобланади. 2018 йилнинг 1 октябрь ҳолатига кўра, банкнинг умумий активлари 3,3 трлн сўмни ташкил қилди, банк томонидан берилган кредитларнинг жорий қолдиғи 2,4 трлн сўмга етди. Банкнинг бўлимлар тармоғи Ўзбекистоннинг турли шаҳарларида жойлашган 15 та филиал ва 53 та экспресс-марказни ўз ичига олади.
Реклама ҳуқуқи асосида
Изоҳ (0)