Буюк Британия ҳукумати коррупцияда айбланаётган Гулнора Каримованинг мамлакат ҳудудидаги кўчмас мулк объектлари ва бошқа активларини хатга олишни режалаштирмоқда, деб ёзади «Podrobno.uz» Британиянинг Ўта йирик миқдордаги фирибгарликларга қарши курашиш бюросига таяниб.
«Бошқарма амалдаги қонунчиликка мувофиқ объектларни фуқаролик тартибида мусодара қилиш ҳақида суд даъвосини берди. Даъво бир қатор активларга, шу жумладан, Буюк Британиядаги учта кўчмас мулк объектига тааллуқли, улар, идоранинг тахмин қилишича, Ўзбекистонда Гулнора Каримова ва Рустам Мадумаров иштирокидаги коррупциявий битимлардан олинган даромадлардан фойдаланиб сотиб олинган», — дейилади идора хабарида.
Аввалроқ, Гулнора Каримованинг қизи Имон Лондонга учиб кетгани ҳақида хабар берилган эди.
Маълумот учун, Гулнора Каримова 2015 йилнинг августида жиноят ишлари бўйича Тошкент вилояти суди томонидан бир қатор жиноятларда айбдор деб топилган. Жумладан, Каримова жиноий гуруҳ тузишга алоқадорлик, ўғирлик, пул ундириш, давлат маблағларини ўз эҳтиёжлари учун ишлатиб юбориш, солиқлар тўлашдан бош тортиш сингари жиноятларда айбланган ва 5 йил муддатга озодликдан маҳрум қилинган.
Изоҳ (0)