Ўзбекистонда илк бор халқаро робототехника мусобақаси ўтказилади

Ўзбекистонда илк бор халқаро робототехника мусобақаси — International Robotics Challenge ўтказилади. Бу ҳақда «Turon 24» хабар берди.

«Ўзбекистон инновацион ривожланиш вазирлиги ҳамда Ёшлар иттифоқи Innoweek инновацион ҳафталиги доирасида халқаро робототехника мусобақасини ўтказади. Бундан асосий мақсад ёшлар орасида интеллектуал салоҳиятни ривожлантириш, инновацион технологиялар ва тадбиркорликни оммалаштириш, ёшларни инновацион технологияларга қизиқтиришдир», — дейилади хабарда.

Мусобақа 23—26 октябрь кунлари «Ўзэкспомарказ»да бўлиб ўтади. Танловда 9 ёшдан 16 ёшгача ҳамда 16 ёшдан 25 ёшгача бўлган ёшлар иштирок этиши мумкин.

Иштирокчилар Lego sumo, Lego short track, Arduino sumo ва маҳаллий конструктор йўналишларида беллашади.

Мусобақада иштирок этиш учун аризалар 10 октябргача онлайн тарзда қабул қилинади.