1 октябрь – «Ўқитувчи ва мураббийлар куни» муносабати билан Тошкент давлат юридик университетида Ўзбекистон Республикаси адлия вазирлиги тизимида юридик кадрларни тарбиялаб келаётган профессор-ўқитувчилар учун байрам тадбири ташкил этилди. Тадбирда адлия органлари ва муассасалари вакиллари, Юристлар малакасини ошириш маркази, Тошкент давлат юридик университети, академик лицей ва юридик коллежларнинг профессор-ўқитувчилари иштирок этди. Бу ҳақда «Дарё»га Адлия вазирлиги Жамоатчилик билан алоқалар бўлими хабар берди.
Тадбирда Адлия вазири Русланбек Давлетов сўзга чиқиб, таълим соҳасида олиб борилаётган кенг миқёсли ислоҳотлар, бу жараёнда юридик таълимга қаратилаётган алоҳида эътибор ҳақида ўз муносабатини билдирди. Адлия вазирлиги доимо мамлакатимизнинг юридик кадрлар тайёрлаш тизимига расман жавобгар идора эканлиги, ҳозирда вазирлик тасарруфидаги юридик таълим муассасаларида 1000 га яқин педагог ходимлар меҳнат қилиб келаётганлиги таъкидланди. Улар орасида 1 нафар академик, 22 нафар профессор, 23 нафар фан доктори ва 67 нафар фалсафа докторлари мавжуд.
Республиканинг барча ҳудудларида 14 та юридик коллежлар ташкил этилган. Мазкур коллежларнинг энг намунали битирувчилари ҳудудий адлия органларининг йўлланмалари бўйича кириш тест синовларисиз Тошкент давлат юридик университетига ўқишга қабул қилинади. Шунингдек, университетнинг магистратурасида ўқитиш муддати 1 йилга қисқартирилди.
Тадбирда ёшлар тарбиясида ўзининг муносиб ҳиссасини қўшиб келаётган профессор-ўқитувчи ва ходимлар адлия вазирлигининг фахрий ёрлиғи ва қимматбаҳо совғалари билан тақдирланди.
Кўтаринки руҳда ўтган байрам тадбир якуни бадиий қисмга уланиб, унда халқимиз ардоғидаги санъаткор ва маданият ходимлари иштирокида концерт дастури ташкил этилди.
Изоҳ (0)