Олимпия шон-шуҳрати музейида Жисмоний тарбия ва спорт вазирлиги ташаббуси билан байрам тадбири ташкил этилди. Унда жорий йилда Индонезиянинг Жакарта ва Палембанг шаҳарларида ўтказилган XVIII ёзги Осиё ўйинларида ғолиб ва совриндор бўлган спортчилар мураббийларига пул мукофотлари топширилди, дея хабар беради ЎзА.
Президент маслаҳатчиси А.Абдувоҳидов, жисмоний тарбия ва спорт вазири Д.Набиев ва бошқалар мамлакатда ёшларни маънан етук, спортга бўлган қизиқишини ошириш, бу борадаги ютуқ ва ғояларини қўллаб қувватлаш йўлида самарали ишлар қилинаётганини таъкидлади. Шунингдек, барчани 1 октябрь – Ўқитувчи ва мураббийлар куни байрами билан табриклаб, спорт мураббийларига масъулиятли ишида муваффақиятлар тилади.
Шундан сўнг Вазирлар Маҳкамасининг XVIII ёзги Осиё ўйинлари ғолиб ва совриндорларини тайёрлаган тренерларни тақдирлаш бўйича фармойиши ўқиб эшиттирилди.
Унга кўра, Осиё ўйинларида шогирдлари олтин медални қўлга киритган мураббийлар 2500, шогирдлари кумуш медаль соҳиби бўлганлар 1500, бронза медалга эга чиққан спортчиларнинг мураббийлари эса 1000 АҚШ доллари миқдоридаги мукофот пули билан тақдирланди.
Эслатиб ўтамиз, Индонезиянинг Жакарта ва Палембанг шаҳарларида ўтказилган XVIII ёзги Осиё ўйинларида ўзбекистонлик спортчилар 21 олтин, 24 кумуш ва 25 бронза, жами 70 та медални қўлга киритиб, мазкур ўйинлар тарихидаги энг яхши натижани қайд этган эди.
Изоҳ (0)