Олий Мажлис Сенатининг XVI ялпи мажлисида 21 та масала кўриб чиқилади

Бугун, 27 сентябрь куни Ўзбекистон Республикаси Олий Мажлис Сенатининг XVI ялпи мажлиси ўз ишини бошлади. Бу ҳақда «Дарё» мухбири Севара Нишонова хабар бермоқда.

Сенат ялпи мажлиси соат 10:00 да Ниғматилла Йўлдошев томонидан очиқ деб эълон қилинди.

Ялпи мажлисда сенаторлар томонидан 21 та масала, хусусан 14 та қонун лойиҳаси кўриб чиқилади.

Сенаторлар «Давлат божхона хизмати тўғрисида»ги Ўзбекистон Республикасининг Қонунининг янги таҳририни, «Хусусий бандлик агентликлари тўғрисида»ги қонун, «Фуқаролар йиғини раиси (оқсоқоли) сайлови тўғрисида»ги қонунларни кўриб чиқади.

Шунингдек, ялпи мажлисда «Давлат хавфсизлик хизмати кунини белгилаш тўғрисида»ги қонун ҳам муҳокама қилинади.

Бундан ташқари, мажлисда давлат бюджети харажатларига ўзгартириш киритиш, қишлоқ хўжалигида меҳнатга оид муносабатларни тартибга солиш ҳамда мазкур соҳадаги норасмий бандлик масалалари юзасидан Ўзбекистон Республикаси Бош вазири ўринбосари – молия вазири Жамшид Қўчқоровга парламент сўрови юбориш масалалари ҳам муҳокама қилинади.