Ўзбекистон ёшлари умумжаҳон ассоциациясининг расмий веб-сайти ишга туширилди. Бу ҳақда «Дарё»га Ёшлар медиа маркази маълум қилди.
Сайтга ассоциациянинг хорижий мамлакатлардаги вакиллари, улар фаолият юритадиган манзиллар, телефон рақамлари ва электрон манзиллари ҳақидаги батафсил маълумотлар жойлаштирилган.
Фойдаланувчилар сайтнинг «Миграция қонунчилиги» бўлимида Германия, Россия, Жанубий Корея, Туркия, АҚШ, Япония, Қозоғистон, Хитой ва Қирғизистон давлатларининг миграцион қонунчилиги билан яқиндан танишишлари мумкин.
«Хорижда таълим олиш» бўлимида чет элда таълим олиш истагида бўлган ёшлар учун билиш муҳим бўлган қоидалар, хорижда таълим олганлик тўғрисидаги ҳужжатларни нострификациялаш ва ўқишни хориждан Ўзбекистонга кўчириш тартиби ҳамда келиб чиқиши ўзбекистонлик бўлган ёшларга ўзбек тилини ўрганиш учун хорижий мамлакатларда ташкил этилган «Ўзбек тили ўқув курслари» тўғрисидаги маълумотлар жамланган.
Фойдаланувчилар «Электрон кутубхона» бўлимида ўзбек тили ва адабиётини ўрганиш учун электрон ўқув қўлланмалар ҳамда ўзбек адабиёти намуналари билан яқиндан танишади.
«Элчихона ва консулликлар» бўлимида Ўзбекистоннинг хорижий мамлакатлардаги элчихоналари ва консулликлари, улар жойлашган манзиллар, телефон рақамлари, веб-сайти ҳамда электрон манзили ҳақидаги маълумотлар жамланган.
«Волонтёрлар учун» бўлимида ассоциациянинг хорижий мамлакатлардаги волонтёрлик харакати, шунингдек, хорижий мамлакатларнинг бир қатор олий таълим муассасаларида ўзбекистонлик ёшларни қўллаб-қувватлашга тайёр бўлган координаторлар ҳақида маълумотлар келтирилган. Мазкур бўлимда хорижда таълим олаётган ва меҳнат қилаётган ёшлар волонтёрлар сафига қўшилиш учун электрон рўйхатдан ўтиши мумкин.
Изоҳ (0)