3 октябрдан Green Card лотереясини тўлдириш бошланади: нималарни билиш керак?

Green Card 2020 лотереясида қатнашиш учун онлайн рўйхатдан ўтиш Тошкент вақти билан 2018 йил 3 октябрь куни 22:00 да бошланиб, 6 ноябрь 22:00 гача давом этади. Forum Daily ёзишича, АҚШ давлат департаменти расмий маълумотлари бўйича 2020 йилда 50 мингта грин-карта ўйналмоқда.

Лотереяда қатнашиш учун иккита асосий шарт қуйидагича:

• лотереянинг иштирокчи давлатларидан бирида туғилган бўлиш керак (бунга барча собиқ иттифоқ мамлакатлари ва Исроил ҳам киради);
• тугалланган ўрта маълумотга ёки мутахассислик бўйича сўнгги 5 йилдаги 2 йиллик меҳнат  стажига эга бўлиш керак.

Рўйхатдан ўтиш учун ариза тўлдираётган да таълим ёки меҳнат стажи ҳақидаги ҳужжатлар илова қилинмайди, аммо улар иммиграцион виза олишда интервью чоғида элчихона ходимига кўрсатилади. Агар сиз таълим олганингизни ёки иш стажингизни исботлай олмасангиз, лотереяда ютиб чиққандан кейин ҳам анкетангиз дисквалификация қилиниши мумкин.

Барча аризалар электрон равишда рўйхатга олиш даврида http://www.dvlottery.state.gov саҳифаси орқали топширилиши шарт. DV лотереясига ариза бериш учун ҳеч қандай ҳақ олинмайди.  Барча мурожаатчилар аризаларининг мақомини кейинчалик текшириш учун, аризаларини топшириб бўлганларидан сўнг, ўз тасдиқлов варақларини босмадан чиқариб, сақлаб қўйишлари шарт.  Мурожаат этувчиларга аризаларини топшириш учун рўйхатга олиш даврининг сўнгги ҳафтасигача кутмаслик тавсия этилади.  Дунё бўйича талабнинг ўта юқорилиги интернет саҳифаси ишининг секинлашувига олиб келиши мумкин.  2018 йил 6 ноябрь соат 22:00 дан кейин бирорта ҳам ариза қабул қилинмайди.

Гарчи кўплаб компаниялар «Турли миллат вакиллари учун иммиграцион визалар» дастурига ариза топшириш бўйича ўз хизматларини таклиф этса ҳам, уларнинг хизматларидан фойдаланиш шахснинг лотереяда ғолиб бўлиш эҳтимоллигини ҳеч қайси йўл билан оширмайди.

Шу сабабли анкетани воситачилар хизматидан фойдаланмаган ҳолда, мустақил тўлдириш тавсия этилади. Анкета жуда оддий, уни ҳатто инглиз тили даражаси паст бўлган кишилар ҳам бемалол тўлдира олади, тўлдиришга 20 дақиқа вақт кетади.

Анкетани тўлиришни бошлаганингиздан кейин сизда барча маълумотларни киритиш учун 1 соат вақт бўлади. Бу вақтдан ошиб кетса, ҳаммасини қайтаан бошлашга тўғри келади.

Анкетага турмуш ўртоғингиз ва 21 ёшгача бўлган фарзандларингизни киритишингиз керак. Эр-хотин алоҳида ҳолда ҳам анкета тўлдириши мумкин.

Анкета учун суратлар сўнгги 6 ой ичида олинган бўлиши ва ҳозир қандай кўринишда эканлигингизни кўрсатиши керак.

Анкетани тўлдириб, Submit («Юбориш») тугмасини босганингиздан кейин, сизга тасдиқлаш рақами кўрсатилган хабар келади. Уни албатта сақлаб қўйинг — усиз грин-картада ғолиб бўлган-бўлмаганингизни била олмайсиз.