Бутунжаҳон туризм куни муносабати билан 27—29 сентябрь кунлари Самарқанд шаҳрида бир қатор маданий-кўнгилочар тадбирлар ўтказилади. Бу ҳақда «Зарафшон» хабар бермоқда.
Вилоят ҳокимлигининг чора-тадбирлар дастурида белгиланишича, 27 сентябрь куни Самарқанд шаҳридаги барча маданий мерос объектларига кириш бепул амалга оширилади. «Руҳобод» мажмуасидаги Ҳунармандлар марказида концерт дастури намойиш этилади. Шунингдек, шаҳардаги Ислом Каримов кўчаси, Registon майдони атрофида ва бошқа туристик масканларда Самарқанд сайёҳлик салоҳияти бўйича тақдимотлар, миллий ҳунармандлик маҳсулотлари кўргазма-савдолари ташкил этилади.
Шу куни оқшом Registon майдонида маҳаллий аҳоли ва сайёҳлар учун 3D меппинг шоуси намойиш этилади.
28 сентябрь куни Ислом Каримов кўчасида тадбирлар давом этади ва кечга яқин «Бибихоним» чойхонасида «Мега палов» тадбирига ҳозирлик бошланади. «Мў’табар зардўз» хусусий корхонаси ташаббуси билан бу ерда 1 тонналик палов тайёрлаш режалаштирилган. Бунинг учун Фарғонадан 2 тонналик улкан қозон Самарқандга келтирилди.
29 сентябрь куни бир тонналик ош тайёрлаш жараёнини хорижлик сайёҳлар бевосита кузатиб боради.
Изоҳ (0)