«Ўзбекистон почтаси»нинг Самарқанд филиали раҳбари пора билан қўлга тушди

«Ўзбекистон почтаси» акциядорлик жамиятининг Самарқанд филиали директори Шерали Умаров пора олиш вақтида қўлга тушди, деб ёзади «Газета.uz» Ўзбекистон Бош прокуратурасига таяниб.

Қўлга олиш бевосита у фуқаро У. Ёқубовдан унга филиал ҳудудидан дўкон ва маиший хизмат кўрсатиш пункти қуриш учун ер участкаси ажратиш эвазига 40 минг доллар олаётган вақтда юз берган.

Ушбу ҳолат бўйича вилоят прокуратураси томонидан Ўзбекистон Жиноят кодексининг 168-моддаси (фирибгарлик) 4-қисми ва 211-моддаси (пора бериш) 3-қисми бўйича жиноят иши очилди, тергов ҳаракатлари олиб борилмоқда.

Шерали Умаровга нисбатан ҳибсга олиш кўринишидаги эҳтиёт чораси қўлланилди.