Эроннинг Аҳваз шаҳридаги ҳарбий парад вақтида юз берган теракт оқибатида ҳалок бўлганлар сони 28 кишига етди, яна 60 киши тан жароҳати олган. Бу ҳақда «РИА Новости» хабар бермоқда.
Эрон парламентининг мудофаа масалалари бўйича қўмитаси раиси ўринбосари Абу Фадл Бегийнинг сўзларига кўра, ҳужум қилган жангариларнинг уч нафари воқеа жойида йўқ қилинган, қолганлари эса шифохонадавафот этган. Унинг сўзларига кўра, террорчилар Саудия Арабистонидан ва Исроилнинг «Моссад» хизматидан кўмак олган.
Депутатнинг қўшимча қилишича, террорчилар Ироқ Курдистонидан келган бўлиб, улар бир муддат аввал Эрон томонидан ўққа тутилган жангарилар гуруҳига мансубдир.
Маълумот учун, Аҳваз шаҳри Эрон жанубида, Ироқнинг жанубий вилоятларига яқин жойлашган. Шаҳарда асосан араблар истиқомат қилади. Ироқ Курдистони эса Ироқ шимолида жойлашган.
Аввалроқ Эроннинг IRNA ахборот агентлиги Аҳваздаги ҳужум учун жавобарликни Саудия Арабистонига алоқадор «Аҳваз араб ватанпарварлик демократик ҳаракати» гуруҳи ўз зиммасига олгани ҳақида хабар берган эди.
Ўз навбатида, Эрон ташқи ишлар вазири Жавод Зариф ушбу теракт учун жавобгарлик «минтақадаги терроризм ҳомийлари ва уларнинг америкалик йўриқчилари» зиммасида эканини таъкидлаган эди.
Изоҳ (0)