АҚШ Меҳнат вазирлиги жорий йил 20 сентябрь куни эълон қилган болалар меҳнатининг энг ёмон шакллари тўғрисидаги 2017 йилги ҳисоботда Ўзбекистон меҳнат ҳуқуқларини ҳимоя қилиш соҳасида салмоқли чоралар кўрган мамлакатлар тоифасига киритилди. Бу ҳақда ЎзА хабар берди.
Ҳужжатда қайд этилишича, бу Ўзбекистонда давлат томонидан пахта теримида болалар меҳнатидан фойдаланишга чек қўйиш бўйича қатъий чоралар кўрилгани билан боғлиқ. Ушбу вазирлик Халқаро меҳнат ташкилоти, ҳукумат ва мустақил ҳуқуқ ҳимоячилари ўтказган мониторинг натижаларига таяниб, болаларни пахта йиғим-теримига тизимли равишда жалб этишга тўлиқ барҳам берилганини эътироф этди.
Ҳукумат томонидан 2017 йилда кўрилган чоралар ёритилган ҳисоботда болалар меҳнати ва мажбурий меҳнатнинг олдини олиш ҳамда унга чек қўйишга қаратилган Фуқароларнинг кафолатланган меҳнат ҳуқуқларини таъминлаш масалалари бўйича Парламент комиссияси ташкил қилингани қайд этилган.
Шунингдек, Ўзбекистон эришган муваффақиятлар қаторида қишлоқ хўжалиги экинларини диверсификация қилиш, ғўза майдонларини қисқартириш, пахтанинг харид нархини ошириш ва уни йиғишни механизациялаштириш назарда тутилган аграр соҳани модернизация қилиш режаси қабул қилингани ва изчил амалга оширилаётгани алоҳида таъкидланган.
АҚШ вазирлиги Ўзбекистонда етиштирилган пахтани 2009 йилдан буён илк бор болалар меҳнатидан фойдаланган ҳолда ишлаб чиқарилган маҳсулотлар рўйхатидан чиқариб ташлади.
Ушбу қарор Ўзбекистонда ишлаб чиқарилган пахтанинг АҚШ бозорига кириши учун янги истиқболлар очади.
Аввалроқ АҚШ Давлат департаменти томонидан 2017 йилда одам савдоси билан боғлиқ вазият бўйича ҳисобот эълон қилинган, унда Ўзбекистон болалар меҳнати ва мажбурий меҳнатга барҳам беришда катта ютуқларга эришгани учун учинчи тоифадан иккинчи тоифага ўтган эди.
Изоҳ (0)